भांगरभूंय | प्रतिनिधी
संवसारभरांतल्या देशांची लोकसंख्येक लागून वेगवेगळी समस्या आसा. कांय देशांनी वाडटे लोकसंख्येची समस्या आसा जाल्यार कांय देशांक उणी जावपी लोकसंख्येचो हुस्को सतायता. कांय देश तांच्या देशांत तरणाट्यां परस वाडपी ज्येश्ठ नागरिकांचे संख्येक लागून हुस्क्यांत पडल्यात जाल्यार कांय देश तांच्या देशांत जल्माचें प्रमाण उणें जाल्ल्यान त्रासांत सांपडल्यात.
ह्या सगळ्या विशयांचेर लोकांचें लक्ष ओडून घेवपाक आनी खोलायेन विचार करचे खातीर 11 जुलय संवसारीक लोकसंख्या दीस म्हूण मनयतात.
सध्या संवसाराची लोकसंख्या सात बिलियना परस अदीक आसा. कांय वर्सां फाटीं वाडटे लोकसंख्ये विशीं हुस्को जाल्लो तेन्ना 1987 त संवसाराची लोकसंख्या केन्ना पांच बिलियन जातली हाचेर नदर दवरिल्ली. घडये तो दीस 11 जुलय आशिल्लो. दुसऱ्याच वर्सासंयुक्त राष्ट्र उदरगत कार्यावळीचें गवर्नींग कावंसिला वतीन (यूएनडीपी) ह्या दिसाच्या उगडासांत ‘फायव्ह मिलियन डे’ मनयलो. हे समस्येचेर पुराय संवसाराचें लक्ष ओडून घेवचे खातीर 1990 त यूएनओन 11 जुलय संवसारीक लोकसंख्या दीस घोशीत केलो.
वाडपी लोकसंख्येक लागून पृथ्वीचेर वजें वाडपाक लागलां. ताचो वायट परिणाम पर्यावरणाचेर जावपाक लागला. संवसारीक लोकसंख्या दीस हाचे कडेन संबंदीत समस्ये विशीं लोकां मदीं जागृताय करता. ह्या दिसा कुटुंब नियोजन, लोकांचे अधिकार, आवय आनी भुरग्याची भलायकी ह्या सारक्या विशयांचेर कार्यावळी आयोजीत करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
