गंडभैरांवाली दिश्टबाधा!

भांगरभूंय | प्रतिनिधी

एक अणभव – 15

–

हें हावसिंग सोसायटीचें कथानक प्रत्यक्ष अणभवांचेर आनी कांय काल्पनीक गजालींचेर आदारून आसा. प्रत्यक्ष जिवो वा मरण आयिल्लो मनीस, घडणूक हांचे कडेन हाचो संबंद ना. तो जुळत जाल्यार निव्वळ एक योगायोग समजुचो.

– लेखक

ह्या बोवाळांत, गुरवान सालू कडल्यान बुधवाराक  दिश्ट काडूंक येता म्हणून रकाद  धाडिल्लो. हांव हस्तांतरणाच्या तयारेक लागिल्लों.  (आतां मुखार….)

गुरव बुधवाराक तिळसना  संकुलाक पाविल्लो. दिश्ट काडपाचें सगळें सामान तो घेवन आयिल्लो. हांव तीमण्णा आनी पुरतोषम गेटीर आयले. गुरवान सांगिल्लें ते भशेन आमी पाव मिटर काळें लुगट, मीठ, तांदळा पीठ, सुकी  मिरसांग, हरवी मिरसांग, लिंबू , हाडून तयार दवरिल्ले.  गुरवान आपल्या बोटव्यांतल्यान कापूस, पयलीं तेंपावेलो पोनेळा भशेन दिसपी नळ्याचो एक कुडको, लांब  केंसाचो चुम्बो,एक गावठी  तांते  आनी फडकी  भायर काडली. एका सरयेक सकल कोळशाचो कुडको   बांदून मागीर तेच सरयेचेर लिंबू आनी हरव्यो मिरसांगो चडयत तोंडान   मंत्र गुणगुणत  सरयेचे दुसरे पोंत गेटीक बांदून हुमकळायले. गुरवान मुखार सांगलें की  हे दिश्टीचे कोळसो, लिंबू मिरचीचे हुमकळणे  येता तो शेनवार धरून सात शेनवार तो स्वतः घेवन येवन गेटीचेर बांधून वतलो. ते कसले कुवाडे, वायट नदरे पुसून कशें साल्वार करता, आनी ताचे फाटलो अर्थ कितें हे  ताणें आमकां समजावपाचो यत्न केलो.  पूण आमचे तकले वयल्यान  तें गेलें.  ह्या हुमकळण्याक  बांदिल्लो कोळसो एका विशिष्ट्य रानवटी झाडाच्या लाकडापुसूनच करतात हेवूय गुरवानं आमका सविस्तर सांगले.  गंडभैरांवाल्या उचांबळायेचेर आनी अस्वस्थतायेचेर गुण पडून सोसायटी भितर सुख,  शांती आनी खेळीमेळीचें वातावरण  येवचे खातीर हो एक रामबाण उपाय अशेंय ताणें आमकां सांगलें. 

मागीर  कापूस घेवन   गुरवान एक बावलेंशें तयार केलें, पाचवी ताल  चुट्टी घेऊन एक वक्ल तयार केलें, व्हिराचे दोन दाणे कुशीन लायत ते कापसाच्या बावल्याच्या दोळ्यार चडयले. ताच्या कपलाक  कुंकुम आनी दोळ्यांक काजळ  लायलें,  जिबेच्या पोंतार थुक काडली. बोट जिबेक लावून ओलें करीत गेटीच्या पायपाक लायलें आनी कापसाचें बावलें थंय दसयलें, फस्काची काडी मारीत तें बावले ताणें लासयलें, जाल्लो गोबोर हातात घेवन, तोंडान दिश्ट वचुं, दिश्ट वचुं म्हणत  आमच्या कपलाक  आनी गेटीक तिबो लायत  उरिल्लो गोबोर नळकुटेचेर उडयलो.  

तांदळाचें पिठ ताणें तेल आनी उदक घालत  कालयलें  आनी हे खेप पिठाचें बावले करीत काळो कपडो ताका गुटलायलो. ताचेर ताणें  पिंजर ओली करून दोळे, जीब, छाती, कमर, हात आनी पांय पितारले. धवो फुल्ल कापूस घेवन ताच्या हाताक  कांकणां, गळ्यांक हार केले. मदीं मदीं ह्या कापसाच्या हाराक पीळ घालीत ताणें प्रत्येक पिळार  काजळ लायले. आता तो हार काळो, धवो असो सोबीत दिसतालो.  हे बावलेच्या पायांक  काळी दोरी बांदून ताणें ती बडयेक उमकळायली  आनी नळकुटेचे कुशीक ती पुरली. एके नाल्लेंत काळे तीळ घालून ताचेर तेलाची बारीक धार सोडली आनी तें लासयत ताची धुंवणी ताणें ह्या काळ्या बावल्याक दिली.  मागीर  नळकुटेचेर काळो किट्ट कोळसो आनी नाल्लाचो काथो दवरून फस्काचे एकेच  काडयेन  उजो पेटोयलो. मीठ आमच्या आनी गेटीचे भोंवतणी पांच खेपे  दाव्यांन  उजवे आनी पांच खेपे उजव्यांन दावे  उंवाळीत त्या उज्यार घाले, फडकी आनी  सुक्यो  मिरसांगो  बी तशोच उडयल्यो.  तोंडांतल्यान कितें मंत्र म्हणत तो बडयेक बांदिल्ले बावले हालयतालो आनी वैर  हवेंत फाफुडतालो. येन्ना म्हळ्यार नळकुटे वयल्यो मिरसांगो लासून वास आमगेल्या तकलेक मारिल्लो. गुरवान  दिश्टबाधा, करणीबाधा,  जे कितें वाईट आशिल्ले तें सगळे आतां निवारण जालें अशी सांगणी केली.  जो म्हारु गंडभैरांवाचे गोमटेर बशिल्लो ताचें निवारण जावन, आता मुखार ताका सोसायटी बरेबशेन चलोवपाची बुद्दी येवं अशेंय सांगणे गुरवा कडल्यान आमी करून घेतलें.   फुडें  ताणें नळो दोनशे मेत्र सुमार पयस व्हरून रस्त्या कुशीक दवरलो, आनी ताजेर तो थुकलो. वाटेर अशी केन्नाय काडिल्ली दिश्ट दिसल्यार अवश्य तिचेर थुंकचें अशेंय ताणें आमकां सांगलें, जेणेकरून खंय ही दिश्ट पळयतल्याक बादीकार जायना. वाटेर तांत्ये फुटून तातूंतलो बोळ मदीच रस्त्यार गळून जाल्ली धवीच आडीय आमचे नदरेक पडिल्ली.   

इतलें जातगर गुरव परत आयलो आनी आपल्या  बोटव्यांतल्यान एक फातर आनी उंडीच्या झाडाचीं पाळां ताणें काडलीं. फातरीचेर उदक घालून बरीं पाचेंक मिनटां तीं  झरयलीं. आमकां रिकामी बाटली घेवन येवपाची ओर्द सोडली. सालू चिवास  रिगल  बाटलेत  उदक पितालो.  ताणें बेगीन बेगीन तीच बाटली थंय हजर केली. पाळां झरोवन तयार जाल्लो लेप  गुरवान बाटलेंत सोडलो. मागीर ताणें बोटव्यांतल्यान मेरवाचें शिंग भायर काडलें, मेजून सात  फावट दाव्यान उजवे आनी सात फावट उजव्यांन  दावे वटेन झरयलें आनी तोवूय लेप बाटलेक घालो.  उदक भरून बाटली फुल केली, बरीच वयर सकयल करीत हालयली.  थोडें उदक हातात घेवन गेटीर फाफुडलें आनी उरिल्लें उदक  सालूक सांगून संबंद सोसायटीच्या संकुलाक शिंपडावपाक सांगलें.   मागीर ताणें येवन   आमचे कडल्यान खांवचें पान आनी  पयशाचो  विडो घेऊन कूस मारली. हें सगळें पळोवून जीव  धादोस जाल्लो, मन प्रसन्न जाल्लें.  गुरवान  कार्ऱ्हेगाद दिश्ट काडिल्ली.   थोड्याच दिसांनी म्हजी आनी म्हगेल्या समितीची ह्या सोसायटीच्या  वेरबांतल्यान सुटका जावपाची आशिल्ली. भूमिका बदलपाच्यो आशिल्ल्यो. गंडभैरावाच्या हातात सोसायटी वच्ची आशिल्ली.

गंडभैरावाच्या घरा जल्लोश जातालो. तागेलो पंगड बिनविरोध तर वेंचून आयिल्लो.  झिंग टीका झिंग टीका वाजप येतना  वतना कानार पडटाले. गुलगुलात, जी  गंडभैरांवाली कट्टर समर्थक आशिल्ली तिय  बी हजेरी लावून जल्लोशांत वांटेकारी जाल्ली. दुर्गाचेर वैर बांदिल्ल्या पलार येरादारी एकदम वाडिल्ली. तागेलो पंगड एकदम खंवदळ घालतालो तो आमचे नदरेक येतालो.  गंडभैरावाचेर नदर घालप ना  म्हूण हांवें तर थारायिल्लें, पूण तागेलें घर म्हगेल्या  येवचे वच्चे वाटेर आशिल्ल्यान म्हाका ती पनवत नदरेक पडटाली. तीमण्णा आनी पुरतोषम दुसरे दिसा मुंबयचे  वाटेन वचूक गेल्ले. हस्तांतरणाची सगळी जबाबदारी म्हजेर आशिल्ली.  एकदाचो  हस्तांतरण  करपाचो  दीस आयलो.  हांव राजाराम आनी सावित्री आमचे वटेन  आनी ताडीमोडी, दुर्गे, दलभंजन आनी  पाशांव  गंडभैरांवा वटेन. गंडभैरांव जरी सगळीं सुत्रां हालयतालो तरी तो वांगडी नाशिल्ल्यान मुखार येवन उलोवपाक शकनाशिल्लो. तशें बरेंपणान सगळे चलताशिल्लें,  पूण इतलीं नाडपेंन्ना करून जातगर आमी ताका लागीं करचे नासले आनी ताकाय  मुखार येवपाक तोंड नासलें.  हांवें पन्नाशेककलमां घालून क्रमवार लिसर तयार केल्ले. लीसराप्रमाणं एक एक  दुकुमेन्ट  काडून हांव ताडीमोडीच्या सुवादीन करतालो. ताडीमोडी परत परत गंडभैरांवाक फोन लायतली आनी तो तिका फोनार उपदेश करतालो. फोनार सुचोवण्यो घेतासतना ताडीमोडीची नदर फक्त  चूक सोदपाचेर आशिल्ली. आनी आमी बिल्डराकडल्यान  सनद, घराचे  प्लांत, कॉमन जाग्याचे प्लांत   कित्याक घेवना  हाजेर  येवन घोडें अडंले.  ही  सगळे बिल्डरा संबंधी  देवाण घेवाण जी आशिल्ली  ती बिल्डरा कडल्यान जेन्ना मेंटेनन्स आमी ताब्यात घेतलें आनी दिसपट्टेचे वेव्हार ताचे कडल्यान विलग जातलें तेन्ना ह्यो सगळ्यो गोश्टी करपाच्यो आमी थारायिल्लें.  आमचे पटयेर तशे बरोवन दवरिल्लें.  हेच न्ही तर विलग जावंचे पयनी देखभाली विशीं कितल्योशोच गजाली आमी पटयेर बरोवन ताची एक प्रत राणेसायबा कडल्यान धाकल्या सायबा कडेन बी पावयिल्ली. ह्या सगळ्या हस्तांतरणाचे घडणुकेक दोन तटस्थ तेस्तमुजय  आमी आपायिल्ले.   पद्धतशीर हॅण्डओव्हर आमी  केलो. दोनी वाटेच्यान आनी तेस्तमुजानीय दुकुमेंतार सायनी जाल्यो.   हो कार्यक्रम सोंपतगेर म्हाका एकदाचें सु जालें. हांव सोसायटीच्या जबाबदारेंतल्यान सुटिल्लो.. (फुडें चलता…)