भांगरभूंय | प्रतिनिधी
खबरां संस्था
ढाकाः ढाका हांगच्या शेर ए बांगला स्टेडियमाचेर खेळयल्ले पयले टी-20 मॅचींत भारताच्या बायल पंगडान बांगलादेशाचेर 7 विकेटींनी दणदणीत जैत मेळयलें. भारतीय पंगडान पयलीं बॉलींग करून बांदलादेशाच्या बायलांक 114 धांवड्यांचेर आडायलें. उपरांत 16.2 ओव्हरींत 3 आवट 118 धांवड्यो करून जैताचें लक्ष्य हातासलें. कॅप्टन हरमनप्रीत कौरान 35 बॉलांत 6 चौके आनी 2 सक्यांनी नाबाद 54 धांवड्यो केल्यो.
115 धांवड्याच्या लक्ष्याचो फाटलाव करतना भारताची सुरवात बाबत जाली. पंगडाक पयलो धपको शून्याचेर बसलो. शफाली वर्माक पयलेच ओव्हरींत मारुफा अख्तरान एलबीडब्ल्यू केलें. ते उपरांत जेमिमा रॉड्रिग्ज लेगीत चडशें कांय करपाक शकलें ना आनी 11 धांवड्याचेर तें आवट जालें. स्मृती मंधाना आनी हरमप्रीतान तिसरे विकेटी खातीर 70 धांवड्यांची भागिादारी केली. मंधानान 34 बॉलांत 5 चौक्यांनी 38 धांवड्यांची खेळी केली. निमाणे हरमन आनी यास्तिका भाटियान पंगडाक जैत मेळोव दिलें. यास्तिका 12 बॉलांत 9 धांवड्यो करून नाबाद उरलें.
टॉस हारले उपरांत पयलीं खेळटना बांगलादेशान 20 ओव्हरींत 5 आवट 114 धांवड्यो केल्यो. तांच्याय डावाची सुरवात बाबत जाली.आनी पांचवे ओव्हरींत मिन्नू मणीन शामिमा सुलतानाक जेमिमाह रॉड्रिग्ज वरवी कॅच आवट केलें. ताणे 17 धांवड्यो केल्यो. उपरांत शथी राणीक 22 धांवड्यांचेर पूजा वस्त्राकरान क्लीन बोल्ड केलें. कॅप्टन निगार सुलताना (2) रनआवट जालें. शोभना मोस्तारीक शफाली वर्मान स्टँप आवट केलें. ताणे 23 धांवड्यो केल्यो. रितू मोनी 11 धांवड्यो करून रन आवट जालें. शोर्ना अख्तरान निमाणे कांय शॉट मारले. ताणे 28 बॉलांत दोन सक्याचे मजतीन नाबाद 28 धांवड्यो केल्यो. भारता वतीन वस्त्रकार, मिन्नू आनी शफाली दरेकी एक विकेट घेतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
