जुगाराचो साथ आनी…. विकास

भांगरभूंय | प्रतिनिधी

घांट वाजता. पड्डो वयर वता. थळ- भांगरभूंय राज्याच्या स्मार्ट सिटींतलो बल्कांव, पात्रा – रामू, श्यामू, दामू, शाणू आनी पाहुण्या भूमिकेत कल्लू)
रामू- आयज शाणू सामकोच टेन्शनांत दिसता मरे. जाला तरी किते?
श्यामू- आरे शाणूच्या चल्याक इंजिनीयरींगाक मेळ्ळें ना.
दामू- कशें शक्य आसा? आमचो शेजारचो भुरगो शिकपाक जेमतेम आसून ताका हांगा मेळ्ळें. शाणूल्याक 97.9 टक्के मेळ्ळे म्हूण पेपरांत फोटो छापून आयिल्लो मरे. कांयच कळना जालां रे बाबा.
शाणू – बाबा रे, ताका ट्यूशन दितल्या क्लासान भांगरभूंय राज्यांत बऱ्या मार्कांनी पास जाल्ले तांचेच फोटे घाल्ले. देशभर तसले शेंकड्यांनी क्लासेस आसात. 99 टक्के मेळयिल्ले हजारांनी भुरगे आसात. ताका जाय आशिल्ल्या कॉलेजांत मेळना म्हूण घरांतलीं सगळीं निर्शेल्यांत. आयज बायलेन रांदलेय ना.
रामू- दामू आयक, तुज्या शेजाऱ्याचो भुरगो जो हांगा शिकून इंजीनियर जातलो ताका हजारांनी रूपया पगार मेळटलो. गणूच्या चल्या सारख्यांची अपेक्षा आसता अमेरिकेक वचून हजारो डॉलरांचें पॅकेज मेळोवपाची. हो फरक जाणा जा.
श्यामू- आनी मागीर ते देशांत परत येनात. थंयच स्थायिक जातात. गणू खंवसल्यार खांदो दिवपाक आमी तिगजाण तर आसतलेच, आनीक एकटो सोदचो पडटलो.
दामू- श्यामू, वेळ- काळ पळोवन उलय रे पापया. कुचित्रीपणा उलोवपाचो, फकांडां मारपाचो हो वेळ न्ही. देवान तोंड दिला म्हूण वाऱ्याक लायनात.
श्यामू- म्हाका एक सांगात, दुडू जोडपा खातीर फकत इंजिनियर जावचें अशें खंय आसा? गणूल्या चल्याची खरी काकुट दिसता. पोर दिसरात शिकिल्ल्यान ताचो देह सुकून पापामडे दिसपाक लागला. पोले पडल्यात, दोळे भोकणांत गेल्यात. पुलिस कश्टडींतल्यान सुटून आयिल्लेवरी दिसपाक लागला. आमच्या वाड्या वयल्या कल्लूचो चलो बी.ए. पास जालो. एकाय विशयांत 35 वयर मार्क ना. 32- 33 मार्क मेळ्ळे त्या विशयांक ओडून ताणून 35 चेर हाडून सोडला आसतले. पूण आपले फामिलींत ग्रेज्युएट जाल्लो तो पयलोच म्हूण बापायन वाड्यार पेडे आनी मिठाय वाटली आनी आयज मेरेन येतल्या वतल्याक पार्टी दित आसता. रातच्यो ओल्यो पार्ट्योय दिता.
रामू- पार्टी आयकल्या, ओली पार्टी म्हळ्यार किते रे?
दामू- अरे सोरो, चिकन चलता ते पार्टेक ओली म्हणटात. हो तुमच्या भटांच्या सिलेबसाचो भाग न्ही. श्रावण लागीं पावला. गरज नासतना भश्टतलो.
रामू- आतां म्हजी लायट पेटली. आरे हो मटकेकार कल्लूची खबर सांगता तर. म्हज्याय कानार पडलां तें.
दामू- पूण एक सांगांत ह्या असल्या पुण्यायेचेर तो मटकेकार सुपुत्र फुडारांत करतोलो तरी कितें?
श्यामू- कितें करतलो? कितें करचो ना तें विचार. कल्लूचो पूत एम. बी. ए, एप्रेंटीसशीप नासतना राज्यांत मटका बूथांची चेन वा मटक्याचो मॉल सुरू करूये. ताचो बापूय सातवी पास. गणूच्या फ्लॅटा परस कितलोसो व्हड ताचो फ्लॅट. बैलांच्या गळ्यांतलो राजू अशी जाडजूड भांगरा सरपळी. आमचो गणू पंदरा वर्सां पयलींची सेंत्रो चलयता, जी केन्ना केन्ना आमी धुकळत स्टार्ट करची पडटा. कल्लूच्या दारांत आठ-धा लाखांची नव्या मॉडेलाची गाडी उबी आसा. बायल दर दिसा नवे साडयेत सजता. कुटुंब खावन पीवन खूश आसता. बँकातले हिशेब पळोवपाक मास्तर दवरला. गणून इतलीं वर्सां 9 ते 5 ऑफिसांत पेना झरोवन कितें कमयलें?
शाणू – मान सम्मान कमयलो. श्यामू, मटकेकार केन्ना सावन तुजो आदर्श जालो रे?
श्यामू- आतां तें पयलीं भाशेन उरूंक ना. मुखार देवळा कुशीच्या दुकानांत टीप-टॉप कावंटर लावन बसला तो मटको घेता तें जाणा मरे तू. भक्ताकूंय कसलेंच ऑबजेक्शन आसना. देवा मुखार प्रसादाच्यो पावत्यो बरवपाक बसयला तोवूय मदींच शेजराच्या मटका मंदिरांत नंबर लावन येता तें सगळें जाणांत.
दामू- बरोबर, आदी मटकेकार रस्त्या कुशीक खाचींनी उबे रावताले, खेळपी चोर कशे लिपून पुट्ट करून नंबर लावन धावताले ती परिस्थिती उरली ना. बाजारकार, धंदेवाले, कामगार आनी व्हड अधिकारीय आतां हड्डे मुखार करून नंबर खेळटना दिसतात. रस्त्याकुशीक आतां टेबलां, खुर्च्यो लावन तीन –चार मोबायल टेबलार दवरून माश्कोता घालून बशिल्ल्या स्मार्ट तरणाटे मटकेकारांची नवी पिळगी दिसपाक लागल्या रे.
शाणू – पूण समाजांत तांका स्थान मेळना रे.
रामू- शाणू तू किते अमेरिकेच्यान आयला? तो कल्लू मटकेकार आमच्या बाबूशालो सामको रायटहेंड मरे. फुडे फाटी नगरसेवक, आमदार जाल्यार कामां खातीर श्यामूच्या वळखीन तुजेरूय ताचे लागीं वचपाचो प्रसंग येत. सांगपाक जायना.
श्यामू- सारखे उलयलो. मुखार दावे कडेन ह़ॉटेल दिसता ताचो मालक मटकेकार हे जग जाणा. ताणेंय नगरसेवक, मेयर पदा भूशयली. हॉटेल बिल्डींगात मटको घेवपाचें ताचें ऑफिस आयज कितल्याश्याच वर्सा सावन चलता. मटक्यातल्यांन कमोवन ताणें दुकानांय घेतलीं. दुकाना मुखार तो उबो आसतना लोक ताची पात्रांव कसो आसा म्हूण खबर घेतात मरे. आमका कोण विचारता?
श्यामू- बरोबर उलयलो. बेस बरो बिजनेस. व्हड गुतवणूक ना, एप्रेंटीसशीप करपाची सक्ती ना. इन्कम टॅक्स ना. हप्तो तितलो दिवपाचो, उपरांत भिवपाची गरज ना.
दामू- हालीं तेंपार मटकेवाले राजकारणांतूय बरेच मुखार पाविल्ले आसात. शाणू म्हाका एक सांग लोक तांकां जर नगरसेवक, आमदार, खासदार म्हूण निवडून दितात, तेन्ना तांकां आदर्श मानप म्हूण हाचे परस आनी विंगड अशें कितें आसता?
शाणू- हाचे पयलीं पुलिसांनी आमदाराच्या बंगल्यार धाड घालून स्लिपी जप्त केल्ल्यो. न्याय कायदो सामको सोंपलो ना बाबांनो.
रामू- आरे, पूण तो ताका आपल्या पक्षांत हाडपाचो सत्तापक्षाचो खेळ आसुयेता. राजकी दुस्मानकायेतल्यान विरोधकांनी आपलें नांव पिट्यार करपाक केल्लो कट अशें ताणें वक्तव्य दिलें म्हण्टकीर प्रकरण थंयच सोंपता. मुखार तो मंत्री जावपाक मेकळो. मागीर तर भिवपाची सामकीच गरज उरना.
श्यामू- आनी आयज खंयच्याय राजकी पक्षाक मटकेकारांची एलर्जी ना. आमी सगळे राजकारणी – साधू. संत न्हय अशे पयर महाराष्ट्राचे उपमुख्यमंत्री देवेंद्र फडणवीस हांणी उघडपणान म्हळां तें खरें दिसता. कमळ पक्षांतलो मटकेकार नाल्लकार पक्ष उबारता. उपरांत तणकार पक्षूय ताका वेंगेंत घेवन वेंचणुकेंत उमेदवारी दिता.
शाणू – तुमी सांगतात तें आतां म्हाकाय पटपाक लागलां. जुगाराक, जुगाऱ्यांक आयज मान मेळपाक लागला तें खरें. पयलीं गडगडो, तीन पानाचो जुगार जात्रांनी दिसतालो. पुलिसांक पळयल्यार सगळे कवळून ते शेतांत धांव मारताले. आयज आमका मटकेकार दिसतात, पूण पुलीस तांकां पळोवन कूस मारतात. कायदेशीर जगजाहीर कोट्यांनी रूपयांचो जुगार न्हंयेंत बोटींचेर चलता. सरकाराक कर मेळिल्ल्यान तो कायदेशीर जाला. आता भोंवडेकारांक भांगरभूंय राज्यांत जुगार खेळपाक येवपाची आमंत्रणां दिवपाक लागल्यात.
शाणू – हे सगळें न्हयेंतलें बुरशेंपण आमच्या भाउसाहेबाच्या पुतळ्या मुखार घ़डपाक लागला ताचें म्हाका वायट दिसता.
दामू – आरे पयलीं हांगा घरदांज मिनेरांची, तांच्या कुटुंबांतल्यांची तोखणाय जाताली तीं चकचकीत म्हारग्या इंग्लीश मासिकां आतां कसिनो मालक, ताची बायल, धूव कितें न्हेसतात, खातात- पितात, खंय सुटयो मनयतात, दिवाळी कशी मनयतात ताचो नियाळ दिवपाक लागल्यात.
रामू- ते सोड. ताचो सुणो कितें खाता, पिता तो कितलो हुशार आसा हाचीय तोखणाय ताच्या फोटवा सयत वाचपाक मेळटा.
( इतल्यान मुखारल्या हॉटेलांतल्यान इश्टांच्या चोंब्या वांगडा कल्लू भायर सरता. श्यामू सट्टकन उबो रावन “कल्लू सायब कशे आसात? ” म्हणत दोनूय हात नमस्कार पोझिशनात तकले वयर व्हरता. कल्लू फकत एक हात हालयत ताका प्रतिसाद दिता. पड्डो पडटा.)

दीपक लाड
पर्वरी