भांगरभूंय | प्रतिनिधी
भारता आड 12 जुलय सावन सुरू जावपी पयले टॅस्ट मॅची खातीर येजमान वॅस्ट इंडिजान आपल्या पंगडान घोशणा केली. निवड समितीन दोन नव्या चेऱ्यांचो आस्पाव केला. जाल्यार सगल्यांत वजनदार खेळगडो म्हणून प्रसिद्द आशिल्लो रहकिम कॉर्नवॉलाचें पुनरागमन जालां. क्रेग ब्रॅथवेट पंगडाचें मुखेलपद सांबाळटलो.
निवड समितीन युवा फास्ट बॉलर जेडेन सील्स आनी अणभवी अश्टतासांचो खेळगडो कायल मेयर्साक पंगडांतल्यान दवरपाचो निर्णय घेतला. दोगूय दुखापतींतल्यान हालींच बरे जाल्यात. तशेंच ओपनर क्रेग ब्रॅथलेटा कडेन परतून एकदा मुखेलपद दिवपाचो निर्णय घेतला.
दावखुरो बॅट्समन कर्क मॅकेन्झी हाची पयलेच खेपे पंगडांत निवड केल्या, जाल्यार दावखुरो अॅलीक अथानेज हो पंगडांतलो आनीक एक अनकॅप्ड खेळगडो आसा.
रहकिम कॉर्नवॉलाक खेळपाची संद मेळ्ळी जाल्यार सुमार दोन वर्सांनी ताची ही पयली टॅस्ट मॅच थारतली. ताणें आपली निमाणी मॅच नोव्हेंबर 2021त श्रीलंके आड गॉलांत खेळिल्लो.
9 टॅस्टींतल्यान 34 विकेटी घेवपी रकहिमाचें एका वेळार 140 कील वजन आशिल्लें. स्पिनर म्हणून पयली पसंती आशिल्ल्या गुडाकेश मोतीक दुखापत जाल्ल्यान कॉर्नवॉलाची पंगडांत निवड केली. हाचे खेरीत स्लो लेफ्ट आर्म ऑर्थोडॉक्स बॉलर जोमेल वॅरिकनाची लेगीत 13 वांगड्यांच्या पंगडांत निवड केल्या. जोमेलान 13 टॅस्टींतल्यान 41 विकेटी घेतल्यात.
वॅस्ट इंडीज पंगडः क्रेग ब्रॅथवेट (मुखेली), जर्मेन ब्लॅकवुड (उप मुखेली), अलिक अथानाज, टॅगेनरिन चंद्रपॉल, रहकीम कॉर्नवॉल, जोशुआ दा सिल्वा, शॅनन गॅब्रिएल, जेसन होल्डर, अल्झारी जोसेफ, किर्क मॅकेन्झी, रेमन रेफर, केमार रोच, जोमेल वॉरकेन.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
