सिंधू, लक्ष्य सेमी फायनलींत

भांगरभूंय | प्रतिनिधी

पी व्ही सिंधू आनी लक्ष्य सेन ह्या भारताच्या बॅडमिंटन खेळगड्यांनी आपआपल्या गटांतली मॅच जिखून कॅनडा ओपन सुपर 500 बॅडमिंटन सर्तीचे सेमी फायनलींत सुवात मेळयली.

काल जाल्ले बायलांचे एकोड्या गटांतले क्वॉर्टरफायनलींत दोन खेपेची ऑलिम्पीक पदक जैतिवंत पी व्ही सिंधून फेंग जी हिका 21-13 आनी 21-7 अशा सरळ गेमींनी हारयली. सिंधू फेंग जी आड चार मॅची खेळ्ळ्या आनी पयले खेपे जैत जोडपाक येस मेळयलां.

आयज जावपी सेमी फायनलींत सिंधू संवसारीक क्रमवारींत पयले सुवातेर आशिल्ले जपानाचे अकाने यामागुची आड खेळटली. यामागुची आडचो सिंधूचो रॅकॉर्ड 14-10 असो आसा. पूण, फाटल्या कांय मॅचींनी सिंधूक तिच्या आड जैत जोडपाक अपेस आयलां. सिंधून फेंग जी आड बरी सुरवात करतना 5-1 अशी आघाडी घेतली. मध्यांतरा मेरेन तिणें आपली आघाडी 11-6 अशी वाडयली. सिंधून येसस्वी रितीन कोर्ट कव्हर केलो. फेंग जीन ते उपरांत मॅचींत पुनरागमन करपाचो यत्न केलो. आनी तातूंत तिका येस लेगीत आयलें. तिणें स्कोर 12-16 केलो. पूण, सिंधून उपरांत तिका कसलीच संद दिली ना आनी पयली गेम 21-13 असो जिखलो. फेंग जीन दुसरे गेमींत 5-1 अशी आघाडी घेतली. पूण, सिंधून रोखडेंच पुनरागमन केलें आनी ब्रेका मेरेन 11-5 अशी आघाडी घेतली. ते उपरांत गेम जिखपाक चड वगत घेवंक ना. सिंधूक पुर्व उपांत्यपुर्व फेरयेंत फुडली चाल मेळिल्ली.

मजगतीं, दादल्यांच्या एकोड्या गटांतले क्वॉर्टरफानलींत लक्ष्य सेनाक जैत जोडपाक संघर्श करचो पडलो. अखेरेक पात्रताय फेरी हुपून आयिल्ल्या जर्मनीच्या ज्युलियन कॅराग्गीक 21-8, 17-21 आनी 21-10 अशा तीन गेमींनी हारोवपाक येस मेळयलें.

लक्ष्य सेन आतां सेमी फायनलींत जापानाच्या केंटा निशिमोता आड खेळटलो. लक्ष्य सेनाचो ताच्या आडचो रॅकॉर्ड 1-1 असो आसा.

दादल्यांच्या दोट्टी गटांत कृष्णा प्रसाद गरागा आनी विष्णवर्धन गौड पंजाला हांचें आव्हान प्री कॉर्टर फायनलींत सोंपलें. भारताचे जोडयेक इंडोनेशियाचे मोहम्मद अहसान आनी हेड्रा सेतियावान हे जोडये कडल्यान 21-9 आनी 21-11 अशा फरकान हारली.