भांगरभूंय | प्रतिनिधी
भारत २६ ‘राफेल एम’ खरेदी करतलो
नवी दिल्ली : प्रधानमंत्री नरेंद्र मोदी 13 आनी 14 जुलयाक फ्रान्स भोंवडेचेर वतले. फ्रांन्साचे राश्ट्रीय परेडींत मोदी मानाचे सोयरे आसतले. भारतीय दर्यादेगेची सुरक्षीतताय बळिश्ट करपा खातीर ही भोंवडी म्हत्वाची अशें मानतात. केंद्र सरकारान नौदला खातीर राफेल झुजारी विमानांची ‘एम’आवृत्ती विकत घेवपाची तयारी पुराय केल्या. वट्ट 26 ‘राफेल एम’खरेदी करतले, अशी म्हायती सूत्रांनी दिल्या.
हीं विमानां वट्ट 5.5 अब्ज डॉलर (45 हजार कोटी रुपया) दरांन मेळटलीं. फ्रेंच विमान कंपनी दसॉ एव्हिएशन हांचे कडेन राफेल एम कराराचेर मोदीच्या फ्रांन्स भोंवडे वेळार सय जावंक शकता. दर्यावेल्या वाठारांतल्या हवाई हल्ल्या खातीर हीं विमानां खासा तयार केल्यांत. तांकां पयलीं देशी विमानवाहक जहाज आयएनएस विक्रांताचेर तैनात करतले. सद्या आयएनएस विक्रांताचेर रशियन मिग-29 विमानां तैनात आसात. प्रधानमंत्री फ्रांसाक वच्चे पयलीं ‘संरक्षण खरेदी मंडळ’कराराक औपचारीक मान्यताय दिवपा खातीर बसका जातली.
केंद्र सरकार फाटलीं 4 वर्सां आयएनएस विक्रांत खातीर नवे झुजारी विमान खरेदी करपाचे येवजणेचेर काम करतालें. अमेरिकन बोइंग एफ-ए-18 सुपर हॉर्नेट आनी फ्रेंच राफेल एम हांचे मदीं निवड करपाची प्रक्रिया दोन वर्सां आदीं सुरू जाल्ली. दोनूय झुजाऱ्यांच्या गुणवत्तेचो आनी दोशांचेर सविस्तर अहवाल तयार केला. भारतीय संरक्षण तज्ञांक राफेल एम हें विमान तांचे गरजे प्रमाण योग्य दिसलें जाल्यार भारतीय तज्ञ बोइंग एफ-ए-18 विमानाचेर एकमत नाशिल्ले. नौदलान फाटल्या वर्सा गोंयांत सुपर हॉर्नेट आनी राफेल एम हांची चांचणी केल्ली.
भारतीय नौदलाक झुजारी विमानांची बेगोबेग गरज आसा. आयएनएस विक्रांताचीय दर्यांतली चांचणी सुरू जाल्या. ताच्या डेक फायटर ऑपरेशनाची अजून चांचणी जावंक ना. ह्या म्हयन्यांत कराराचेर सय जाली जाल्यार तंत्रीक आनी खर्चाची औपचारिकताय पुराय करपाक उण्यांत उणें एक वर्स लागतलें. विमानांची खेप येवपाक 3 वर्सां लागूं येता, अशें सूत्रांनी सांगलां. वायुसेने खातीर 36 राफेलांचो करार 2016 वर्सा जाल्लो आनी हीं विमानां पुराय करपाक 7 वर्सां लागलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
