भांगरभूंय | प्रतिनिधी
गोंय सरकारान अॅप्रेंटीस (प्रशिक्षणार्थी कामगार) येवजण चालीक लावपाक पावलां उखल्ल्यांत. वयलेचाराक येवजण बरी दिसली तरी येवजणेची सुदारीत अधिसुचोवणी वाचून दुबाव घेवपीच चड आसतले. विद्यावेतन वा बारा- पंधरा वर्सां फाटले रोजगारपूर्व प्रशिक्षण येवजणेची याद करून दिवपीय आसात. विद्यावेतन येवजणेंत सुदारणा करुन ती फुडें व्हरपा पासत तजवीज नवे अधिसुचोवणेंत जाल्या. अधिसुचोवणी वाचतकीच कांय प्रश्न उप्रासतात तरी येवजण बरी, सरकाराचो हेतूय बरो आसा. येवजणेक सवकासायेन प्रतिसाद मेळ्ळो तरी येवजण जशी मुखार सरतली तसो येवकारय वाडटलो. येवजणे खाला मेळपी प्रशिक्षणांतल्यान सरकारी खात्यांक, खासगी कंपन्यांक कुशळ मनीसबळ मेळटलें, अशी आस्त बाळगूया.
सरकाराचें क्राफ्टमन ट्रेनिंग ह्या खात्याक हे येवजणेंतल्यान खरेंपणी कुशळताय प्रशिक्षण आनी विकास खात्याचो पावंडो मेळटलो. क्राफ्टमन ट्रेनिंग म्हळ्ळ्यार आय टी आय हो जो छाप बशिल्लो आसा तो ना करपाच्यो तजवीजो येवजणेचे अधिसुचोवणेत आसपावल्यात. हे येवजणेचो लाव पदवी, धावी, आयटीआय, बारावी मेरेन शिक्षण घेतिल्ल्यां खातीरच न्हय पाॅलिटेक्निक डिप्लोमा घेतिल्ल्यांक मेळटलो. प्रशिक्षण पुराय जातकीच सर्टिफिकेट मेळटलें, पूण सरकारी, खासगी नोकऱ्यो मेळटल्योच अशी गॅरॅण्टी अधिसूचोवणेत ना. आयज ना फाल्यां नोकरे खातीर येवजणेतल्यान मेळिल्ल्या सर्टिफिकेटाचो उपेग जातलो, असो विश्वास सरकारान प्रशिक्षणापासत अर्ज करतल्यांक, प्रशिक्षण घेवप्यांक दिवचो पडटलो. एक गजाल येवजणेंत स्पश्ट करची ती म्हळ्ळ्यार नोकरी निमाणे फकत प्रशिक्षणाच्या आदारान मेळची ना ते पासतय मोलावणी जातली. मोलावणी घेतिल्ल्या शिक्षणाची, निमाणे वर्साचे परीक्षेंत मेळिल्ल्या मार्कांची आनी प्रशिक्षण घेतिल्ल्यांक कसलो अणभव मेळ्ळा ताचीय. मोलावणेंतल्यानच कुशळ मनीसबळ अॅप्रेंटीस येवजणेंतल्यान तयार जातलें. कुशळ मनीसबळ तयार करपाचें, सगल्यांक रोजगार दिवपाचें आव्हान सरकारा मुखार आसा. ती मोख पुराय करपाक सरकारान घाल्लीं पावलां येवजणेच्या वर्सुकी नियाळांतल्यान, मोलावणेंतल्यान एकादरे उंचेल्या तांकीचें मनीसबळ घडोवपाक शिक्षणीक बदलाची दिका, वाट दिसतली.
चाळीसय मतदारसंघांतले लोकप्रतिनिधी तशेंच सगल्यो पंचायती, नगरपालिका पावंड्यार येवजणेची माह्यती दिवपी जायरात जाल्यार धा हजार प्रशिक्षणार्थी मेळप कठीण न्हय. सरकारी, खासगी क्षेत्रांत रिटायरमेंटाची पिराय (निवृत्तीची) वाडल्या तातूंतल्यान तरणाट्यां भितर निर्शेणी येता, राजकारणातय तेंच. सरकारी अधिकाऱ्यांचीच न्हय जाल्यार अनुसुचित जाती, जमाती, हेर मागास वर्गांतली भुरगीं सरकारी प्रशिक्षण येवजणेंत सामील जावपाक सोदतालीं, पूण येवजणेचो काळ कितलो आसतलो, स म्हयने, एक वर्स तें अधिसुचोवणेंतले नेमावळींतल्यान सांगल्यार दुबाव पयस जातलो. प्रशिक्षण दिवपी प्रशिक्षणार्थी परस चड शिकिल्ले, अणभवी – (गिन्यानान आनी अणभवान) आसतले हे खातीर सरकारान जतनाय घेवची. शिकयतना कामय करचें पडटलें, येवजणेतलेंच न्हय जाल्यार येवजणे भायलेंय ही माह्यती येवजणेचे अधिसुचोवणेंत आसपाची गरज आसा.
सरकारी नोकरी म्हळ्ळ्यार मजा न्हय, जापसालदारकी. ती खांद्यार घेवपी कुशळ मनीसबळ तयार करपा इतलीच, ताची बांदावळ करप हें काम सोपें न्हय. प्रशिक्षण सरकारी खात्यांनी की संस्थे वरवी जातलें, ते संस्थेक मान्यताय आसा, हेंय प्रशिक्षण घेवपी पिळगेक कळपाक जाय. खात्यांचीं गुपितां फायलींतल्यान प्रशिक्षण घेवप्यां मेरेन पावची नात, हे खातीर अॅप्रेंटिसांक वेगळो कोनसो दितले? रात- दीस प्रशिक्षण आसतलें? प्रशिक्षण कशे तरेन दितले? आॅनलायन? आॅफलायन? हे येवजणेत मंत्री, आमदारांच्या खासगी कर्मचाऱ्यांक आसपावपा खातीर तजवीज जावपाक कितें हरकत आसा? येवजणेक आनी बदलिल्ले नेमावळीक कायदो खात्याची मान्यताय घेतल्या हें सांगल्यार सदां सरकारा कडेन दुबावीत म्हणून पळोवपी सरकाराक शाबासकी दितले. कायद्याचे मान्यतायेचे उपरांतय उणेंपणा दाखोवपी आसतले, पूर्व रोजगार वा रोजगारपूर्व येवजणेंत तशें जालां. न्यायालयाच्या आदेशांतल्यान थोड्यांक घरा वच्चें पडलां, बाप्पाय ना आनी पुडवेंय ना जालां, शेंकड्यांनी उमेदवारांक लावय मेळ्ळा, अजूनय वीस- पंचवीस उमेदवार प्रशिक्षणार्थी वा प्रोबेशनारच आसुये. नोकरेचें उतर सरकारान दिवचे परस रोजगार मेळोवपाक तरणाट्यांक बळगें, अणभव मेळचो म्हणून हें प्रशिक्षण आसा हें आमदारांनी अर्ज करचे आदीं सांगप बरें.
गोंय सरकाराच्यो लाडली लक्ष्मी, गृह आधार, पत्रकार कल्याण निधी, दयानंद सामाजिक सुरक्षा तशेंच हेर पांच- धा येवजण्यो वर्सांची वर्सां उरल्यात. ताचो लावय हजारांनी समेस्तांक मेळटा, दिव्यांगय ते येवजणेंतल्यान बळिश्ट जाल्यात, आप रोजगारांतल्यान ल्हान उद्येग उबारपीय आसात. अॅप्रेंटिस येवजणेत नवें कितें तरी आसा आनी ते पासत हे येवजणेक नांव दिल्यार त्या नांवानच ती समेस्तां मदीं सदां उरतली, ही येवजण सदांच उरतली, चार दिसांखातीर न्हय हें सरकारान सांगल्यार समेस्तांक आशेचें किर्ण दिसतलें.
हे येवजणेत खासगी कंपनीन सध्या प्रशिक्षणार आशिल्ल्यांक आसपावप कित्याक शक्य जावचें न्हय? प्रशिक्षण दिवन नवें मनीसबळ निर्मणे खातीर वेवसायिकांक ही येवजण आदार जातली? सरकारान पयलेच फावट हे येवजणे खाला चड वेतन दिवपाची तजवीज केल्या तें वेळार मेळपाची, दितना आपालिपा जावचो ना हाचेर देखरेख दवरची पडटली. पदवी परीक्षा दिल्या पूण रिजल्ट जावचो आसा तांकां हे येवजणेचो फायदो मेळत व्हय? फुडारांत तशी तजवीजय येवजणेंत आसची. आदले मुख्यमंत्री मनोहर पर्रीकार हांच्या विचारांतल्यान अदमासपत्रकांत उतरांनी दिशिल्ली ही येवजण समेस्तां मेरेन व्हरतना सरकाराचें अर्थिक बळ वाडलां तें केंद्र सरकाराच्या पालवान. सरकाराची येणावळय खणींच्या ब्लाॅकांच्या पावणेंतल्यान वाडल्या. अर्थकारणाक शिस्त हाडपी नवें मनीसबळ अॅप्रेंटीस येवजणींतल्यान मेळचें, कोंकणी भास उलोवपाचें आनी बरोवपाचें प्रशिक्षण दिवपी खाशेली यंत्रणा आसतली हें पळोवचें, राजभास कोंकणीचें गिन्यान गरजेचें आसा, हें मतींत दवरूनच.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
