भांगरभूंय | प्रतिनिधी
खबरां संस्था
हैदराबादः भारतीय क्रिकेट पंगडाचो आदलो कॅप्टन महेंद्र सिंग धोनी हाचे चाहत्ये संवसार भरयां आसात. धोनीचो 42वो वाडदीस शुक्रार 7 जुलयाक ताच्याा ह्या चाहत्यांनी सगले कडेन व्हडा दबाज्यान मनयलो. हैदराबादच्या ताच्या चाहत्यांनी ह्या निमतात हैदराबाद शारांत ताचो 52 फूट लांबायेचो कट आवट तयार करून लायला.
अंदूचे इंडियन प्रीमियर लीग सर्तीचे फायनलींत धोनीच्या फुडारपणा खाला चेन्नय सुपर किंग्जान गुजरात टायटन्साक हारोवन पांचवे फावट करंड जिखल्लो. धोनीन जे तरेक पंगडाचें फुडारपण करून पंगडाक जैत मेळोवन दिले. ताचें कवतूक सगले कडेन जालें. हैदराबादच्या ताच्या चाहत्यांनी कट आवट लागून ताकां परबीं दिल्यांत.
धोनीची हे निमणी आयपीएल आसतली अशें सगल्यांक दिसताले मात चाहत्यांचो मोग पळोवन तो 2024च्या सिझनात खेळपाक शकता. धोनीच्या फुडारपणा खाला भारतीय पंगडान 2007 ची टी-20 संवसारीक करंड, 2011चो वन-डे संवसारीक करंड आनी 2013 वर्सा चॅम्पियन्स करंड जिखल्लो. 350 वन-डे मॅची खेळपी तो संवसारांतलो दुसरो विकेटकीपर आसा. ताचे पयलीं श्रीलंकेचो विकेटकीपर कुमार संगकारा 360 वन-डे खेळ्ळा. विकेटकीपर म्हणून ताणे 404 आनी बॅट्समन म्हणून तो 44 मॅची खेळ्ळा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
