भांगरभूंय | प्रतिनिधी
नॅदरलॅण्ड पंगडान भारतांत 5 ऑक्टोबर सावन सुरू जावपी संवसारीक वन डे क्रिकेट सर्तीची पात्रताय मेळयली. झिम्बाब्वेंत चालू आशिल्ले पात्रताय फेरयेंत काल जाल्ले मॅचींत नॅदरलॅण्ड पंगडान स्कॉटलॅण्डाक 4 विकेटींनी हारयलो.
ह्या जैता सयत नॅदरलॅण्ड संवसारीक सर्तीची तिकेट मेळोवपी 10वो पंगड थारलो.
बुलवायोच्या क्विन्स स्पोर्ट्स क्लबाच्या मैदानाचेर नॅदरलॅण्ड पंगडान टॉस जिखून स्कॉटलॅण्डाक पयलीं बॅटींग करपाचें आमंत्रण दिलें. स्कॉटलॅण्डान निर्धारीत 50 ओव्हरींनी 9 विकेटी वगडावन 277 धांवड्यो केल्यो. नॅदरलॅण्डाक मोखीचो फाटलाव करतना संघर्श करचो पडलो. पूण, बॅस डे लिडान जबरदस्त प्रदर्शन केलें. ताणें साकिब जुल्फिकारा वांगडा मेळून सवे विकेटी खातीर शेंकड्याची भागिदारी केली आनी आपल्या पंगडाक इतिहासीक जैत मेळोवन दिलें. नॅदरलॅण्डान 42.5 ओव्हरींनी 6 विकेटी वगडावन गरजेच्यो धांवड्यो केल्यो.
बॅस डे लिड एकेच वन डे मॅचींत पांच विकेटी आनी 100 धांवड्यो करपी संवसारांतलो चवथो खेळगडो थारलो. ताचे पयलीं रोहन मुस्तफा (109 आनी 5-25 आड पीएनजी), पॉल कॉलिंगवूड (नाबाद 112 आनी आड बांगलादेश) आनी व्हिव्ह रिचर्ड (119 आनी 5-41 आड न्युझिलॅण्ड) हांणी असो पराक्रम केला.
नॅदलॅण्ड निमाणे खेपे 2011 वर्सा भारतांत जाल्ले संवसारीक वन डे क्रिकेटींत खेळिल्लो. हे खेपे संवसारीक सर्त भारतांतूच जातली.
संवसारीक सर्तींत न्युझिलॅण्ड, इंग्लंड, भारत, ऑस्ट्रेलिया, पाकिस्तान, दक्षीण आफ्रिका, बांगालदेश, अफगाणिस्तान श्रीलंका आनी नॅदरलॅण्ड हे पंगड खेळटले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
