भांगरभूंय | प्रतिनिधी
मुख्यमंत्री डॉ सावंतः दीनदयाळ संचालक मंडळाची निवड बिनविरोध
दिवचलः सहकार मळा वांगडाच शिक्षण, भलायकी आनी सेवा मळार वावुरपी दीनदयाळ सहकारी संस्था गोंयांतली आदर्श अशी एक संस्था आसा. लोकांचो विस्वास जोडपा वांगडाय हे संस्थेन एक वेगळोच आदर्श बाळगिला. संस्थेन तरणाट्यांची कुशळताय वाडोवपा खातीर तांकां शिक्षण दिवपाक फुडाकार घेवचो, अशें आवाहन मुख्यमंत्री डॉ प्रमोद सावंत हांणी हे संस्थेच्या जाळवणदारांक केलां.
दीनदयाळ मल्टिपर्पज सहकारी संस्थेच्या नव्या संचालक मंडळाच्या अधिकार घेवपाचे कार्यावळींत ते उलयताले. ह्या वेळार मायचेर संस्थेचो अध्यक्ष वल्लभ साळकार, उपाध्यक्ष कांता पाटणेकार,सगले संचालक आनी अधिकारी मधुकर पाटणेकार आशिल्ले. सरकार कृशी आनी आप रोजगारा खातीर सहकारी संस्थांच्या माध्यमांतल्यान वेगवेगळ्यो येवजण्यो चालीक लायतलें अशी म्हायती मुख्यमंत्र्यांनी दिली.
सहकारी संस्थांची संचालक मंडळां, अधिकारी आनी कर्मचारी प्रामाणीकपणान सेवा दितात ते खातीर वेगळे पद्दतीन सहकार मळार येवजण्यो चालीक लावप शक्य जाला. ताका लागून सहकारांतल्यान समृद्धी कडेन वाटचार सुरू आसा. आयुर्वेदिक हॉस्पिटल, प्राथमीक शाळा आनी हेर माध्यमांतल्यान लोक सेवा सुरू आसा. हेर संस्थांनी दीनदयाळ संस्थे पसून प्रेरणा घेवंन लोक हिताचे उपक्रम चालीक लावपाक फुडें सरचें अशें मुख्यमंत्र्यांनी मागलें. आपल्याक 19 वर्सां खातीर संस्थेचो संचालक केल्ले खातीर तांणी संस्थेच्या जाळवणदारांचे उपकार मानले.
दीनदयाळ संस्थेन जायत्या मळार आपलें योगदान दिवंन हेर संस्थां सामकार एक बरो आदर्श दवोरला अशें दिवचलचे आमदार डॉ चंद्रकांत शेट्ये हांणी सांगले. आदले सभापती राजेश पाटणेकार, दिवचल पालिका मंडळाचो नगराध्यक्ष कुंदन फळारी आनी हेर मानेस्तांनी नव्या संचालक मंडळाक परबीं भेटयलीं. मुधकर पाटणेकार हांणी सुरवेक सगल्यांक येवकार दिवंन सूत्रसंचालन केलें. कांता पाटणेकार हांणी संस्थेच्या वावराचो नियाळ घेतलो.
बिनविरोध वेंचून काडिल्लें नवें संचालक मंडळ फुडले भशेन- अध्यक्ष- वल्लभ साळकार, उपाध्यक्ष- कांता पाटणेकार, संचालक-मुख्यमंत्री डॉ प्रमोद सावंत, प्रदीप चणेकार, अरुण नायक, अर्जुन माळगांवकार, विठ्ठल वेर्णेकार, प्रदीप लाड, डॉ राजेश केणी, श्याम मातोणकार, डॉ संदीप सावंत, शिवाजी जल्मी, सरगम चणेकार, सिद्धी पोरोब, डॉ कशीस पाटणेकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
