सकारात्मक जावपाचें तंत्र

भांगरभूंय | प्रतिनिधी

खूब शिकलेलो वा खूब गिन्यांनी आसलो म्हूण मनीस शाणो आसना. जो मनीस भुतकाळा विशीं आनी फुडारा विशीं चिंताग्रस्त नासता तो खरेलो शाणो. वायट प्रसंग हे खिणयाळे आसतात. ते रावपाक येनात.

भगवद्ग गीतेंत श्रीकृष्ण सांगता कीं जो मेल्ल्या – गेल्ल्या विशीं वा जित्यां विशीं तेच प्रमाण भुत‌काळा विशीं आनी फुडारा विशी
खंत – खेद बाळगीना तोच खरो शाणो. तोच खरेलो बुदवंत. हें भगवंतालें सांगणें आयच्या काळाक लेगून सारकें बरें लागू जाता. आमी शाणे जावंक जाय आनी जिवीतांतल्या अनिश्चीत गजालींक लागून थतरवितर जावंक फावना. जीण म्हळ्यार जल्मा सावन मरणा मेरेनचो एक प्रवास. हे भोंवडेंत आमचे मुखार तरेकवार पर्याय आसतात. आमी जे तरेचे पर्याय निवडटात हाचेर आमच्या ह्या प्रवासाची बरी- वायट निश्पत्ती निंबून आसता. कांय जाण जण एखाद्या गजालींतले सकारात्मक म्हळ्यार हयकारी परिमाण वेंचतात. चडशा जाणांक आपणांल्या सदच्या संवयांक लागून जण एके गजालींत वा परिस्थितींत फकत नकारात्मक वा न्हयकारी वटीच दिसतात. आमी आमच्या चित्तांक प्रत्येक गजाली कडेन केवळ सकारात्मक नदरेन पळोवपाक शिकोवंक जाय.
सद्दां करूंक जाय, असो एक उपक्रम आसा. ताचो सराव केल्यार आमकां आमचे भोंवतणचो संवसार सोबित- सुंदर आसा म्हणपाचो दिश्टावो जातलो. राती कडेन न्हिदूंक वच्चे पयलीं दिसभरांत तुवें ज्यो धा हयकारात्मक गजाली अणभवल्यो, त्यो एका कागदार बरोवप. हे तुजें न्हिदूक वच्चे पयलींचें निमणे काम आसूंक जाय. ह्यो हयकारात्मक गजाली कसल्योय बीन आसूंक शकतात. देखीक आयज तूं बरें रूचीक जेवण जेवलो वा कोणायकूय लिफ्ट दिली वा तुवें आयज एक सुंदर, सवणें पळयलें वा एखाद्या झगड्या वगतार तुवें आत्मसंयम राखलो. असल्यो तुंवें दिसभरांत अणभविल्ल्यो ह्यो सकारात्मक गजाली बरयतकूच रोखडेंच तुका गमतलें की हो संवसार तरेकवार सोबितकायांनी आनी अजापांनी नटला म्हूण. हें जिवीत सुंदर आसा म्हूण. तुका कळटलें कीं तुका सुख शांती आनी बरी भलाय‌की लाभपा खातीर ह्या संवसारांत सगळेंच कितें आसा म्हूण. तुजे जिणेंतलें सगळें घुस्पागोंदळ ना जातले आनी तुका जीण जगप म्हळ्यार सामकें सोपें म्हणपाचें लक्षांत येतलें.
आमच्या दिश्टीकोणांत बदल घडोवन हाडपा पासत हो एक परिणामकारक उपक्रम. आमचे वृत्तींतलो इल्लो लेगीत बदल आमचें जिवीत आस्तदिणें आनी खोसदिणें करूंक शकता.
योगसुत्रांत गुरुवर्य पतंजली दिश्टीकोणाचेर आदारिल्ल्या ‘प्रतिपक्ष भावना’ नांवाच्या एके पद्धतीची शिफारस करता. हे पद्धती प्रमाण जेन्ना – जेन्ना तुजें चित्त न्हयकारात्मक चितनांनी बुडिल्लें आसता, तेन्ना- तेन्ना तुंवे बळयां हयकारात्मक भावनांनी रमपाचो यत्न करप. जेन्ना तूं अस्वस्थ जाता तेन्ना तूं तुज्या आदल्या खोसदिण्या घडणुकांचो उगडास करीत राव वा तुका आनंद दिवपी कसलें तरीं तुजें आवडीचें काम कर. तुज्या न्हयकारी भावनां आड कितें तरी बेगिनात- बेगीन आनी झुजा पांवड्यार कर. अशें करतकूच सकारात्मक कसो जावप हें तंत्र तूं शिकतलो.
आमच्या चित्ताचो रिमोट कंट्रोल आमच्या हातान आसा. आमचे मनस्थितीचे संचालक आमीच आसात. आमी ती चड दुखेस्त आनी भावनावश जावंक दिवया नाका. तिचो प्रवाह सुखदिणो आनी मौजेचो करुया. सूख आनी धादोसकाय प्राप्त करपाक निखटे सकारात्मक विचार आसल्यार पुरो.
खूब शिकलेलो वा खूब गिन्यांनी आसलो म्हूण मनीस शाणो आसना. जो मनीस भुतकाळा विशीं आनी फुडारा विशीं चिंताग्रस्त नासता तो खरेलो शाणो. वायट प्रसंग हे खिणयाळे आसतात. ते रावपाक येनात. येतात तशें वेतात. तांकां तुजें सूख इबाडुंक दिवं नाका. मतीन धर, खर गीम सोंपतकच पावस येता. सुकते उपरांत भरती येता. रात सोंपता आनी दीस उदेता. सैमातले हे बदल लक्षांत घे. कबलात करूंक शिक आनी अनिश्चितायांच्या व्हांवते वांगडा राव. तुजी वृत्ती तुज्या हातान आसा.
सदांच सुखी आनी धादोशी रावपाचो यत्न कर आनी नवें- नवें शिकपाची मनात उमेद बाळग. शाणो जा. म्हेळ्या चिखला मदीं फुलपी साळीक जा.
मूळ लेखक ः हंसाजी योगेंद्र

प्रदीप लवंदे
9923292022