भांगरभूंय | प्रतिनिधी
भांगरभूंय । प्रतिनिधी
बोरयेः सम्राट क्लब इंटरनॅशनल आनी कला आनी संस्कृती खात्याच्या जोड पालवान आयोजीत केल्ले 17व्या सम्राट संगीत सितारा सर्तीचे उक्तावण माशेल सम्राट क्लबा वतीन भगवती मंदिर सभाघरांत जालें. मुळावे फेरयेक सम्राट क्लबाचे सागर पानवेलकार हांचे हस्तुकीं दिवली पेटोवन सुरवात केली. सर्तीचे मुळावे फेरयेंत वट्ट 32 सर्तकांनी वांटो घेतला.
उक्तावण कार्यावळीक तबला वादक तुळशीदास नावेलकार, प्रसाद नायक, सम्राट क्लबाचे राज्य अध्यक्ष शैलेश बोरकार, भांडारी सुरज नायक, माशेल सम्राट क्लब अध्यक्ष अनुराधा रायकार, विभागीय अध्यक्ष भाग्यरेखा गांवस, केंद्र मुखेली मनोज कारापुरकार हाजीर आशिल्ले. पानवेलकार हांणी संगीत सितारा सर्तीचें आयोजन करपा फाटलो हेत सांगलो. 2006 वर्सा सुरू केल्ली ही सर्त आयज मेरेन येसस्वीपणान आयोजीत केल्ले खातीर तांणी सम्राटच्या थळाव्या क्लबांक परबीं भेटयली. आतां मेरेन हे सर्तींत गोंयांक 17 संगीत सितारे दिल्यात अशें तांणी सांगलें.
संगीत सिताराचे 17व्या पर्वाची म्हायती दितना आयोजन समितीचो अध्यक्ष प्रसाद नायक हांणी 16 जुलयाक 12 सर्तकांचो आसपाव आशिल्ली संगीत सिताराची उपांत्य फेरी पाटो पणजी हांगच्या संस्कृती भवनांत दनपारां 3.30 वरांचेर सुरू जातली अशें सांगलें. निमणे फेरयेंत पं अजीत कडकडे म्हागुरू म्हणून हाजीर रावतले आनी संगीत सितारा घोशीत करतले मुखेल परिक्षक म्हणून धर्मानंद गोलतकार काम पळयले. हे सर्तीची बोरये केंद्रातले मुळावे फेरयचें उक्तावण जयंत मिरिंगकार हांणी केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
