भांगरभूंय | प्रतिनिधी
केंद्रांतल्या सत्ताधारी भाजपान आनीक एक राजकी भुंयकांप आयतारा महाराष्ट्रांत घडोवन हाडलो. स्क्रिप्ट लागीं- लागीं तीच,
मात पक्ष आनी पात्रां तितलीं बदलिल्ली. फरक इतलोच कीं फाटल्या राजकी भुंयकापाच्या प्रकरणांत सर्वोच्च न्यायालयान दिल्ल्या निवाड्याचो बरो अभ्यास करूनूच नव्या भुंयकांप नाट्याची स्क्रिप्ट बरयल्ल्याचें स्पश्ट दिसून आयलां. ताका लागून कोणूय कायद्याचे कात्रेंत सांपडचो ना आनी फुडाराक सगळें सुरळीत जातलें हाची दक्षताय घेतल्या. तरी निमाणे ‘श्रींचे इत्से प्रमाण हे सगलें घडलें वा घडोवन हाडलें असो समज करून घेवपाक बरीच सुवात आसा. शरद पवार हांकां महाराष्ट्राचो ‘जाणता राजा’ म्हणून वळखतात. तांणी बरयल्ल्या ‘लोक माझे सांगाती’ ह्या तांच्या राजकी आत्मकथनाच्या पुस्तकांतल्या ‘स्वाभिमानाचे पहिले पाऊल’ ह्या प्रकरणात सादारण चार- सव्वाचार दशकां पयलीं वसंतदादा पाटील हांच्या सरकारांतल्यान आपूण कित्याक भायर पडलों हाचें विश्लेशण तांणी केलां. आनी तें महाराष्ट्रांतल्या सध्याचे राजकी स्थितींत इतलें फीट बसता कीं श्रीचे इत्से प्रमाण सगळें कितें घडून तर आयलें ना मूं, अशें बरेच राजकी तज्ज्ञ विचारपाक लागल्यात.
यशवंतराव चव्हाण हांकां त्या वेळार वसंतदादा पाटील हांचें सरकार वच्चें अशें दिसतालें अशें शरद पवार ह्या प्रकरणांत आपणें त्या वेळार घेतिल्ल्या निर्णयाचें समर्थन करतना सांगतात. तांणी सांगलें कीं चव्हाण सायबाचींय सुप्तेत्सा हें सरकार वच्चें अशीच आशिल्ली. त्या तेपार तांचें मत ‘महाराष्ट्र टाइम्स’च्या माध्यमांतल्यान उक्तें जाता अशें मानताले. ‘मटा’ चे संपादक गोविंदराव तळवळकार हांणी दिल्लींतले चव्हाण सायबाचे भेटी उपरांत ‘हे सरकार जावं, ही श्रींची इच्छा’ असो लेख बरयल्लो. ताका लागून चव्हाण सायबां खातीर हें सरकार फुडें चालू दवरपाक रस ना हाचे संकेंत आमकां मेळ्ळे आनी मागीर दिल्लींत वचून सायबांक मेळ्ळों. दादाच्या सरकारा विशीं ते अजिबात खोशी नाशिल्ले. तांणी सरकारा उडयात अशें आमकां सरळ सांगू ना, तरीय ह्या सरकारा फाटल्यान फरफट करपाची गरज ना अशेंय सूचीत केल्लें, अशें स्वता शरद पवार हांणीच हें सगलें बरोवन दवरिल्ल्यान आयतारा अजितदादा पवार हांणी जो किदें पवित्रो घेतलो ताचे कडेन हाचो कांय संबंद नासतलो अशें छातयेर हात मारून सांगपाक जावचें ना. उद्धव ठाकरे हांच्या फुडारपणा खाला बाकी आशिल्ले सेने वांगडा भरकटत वचपाक कसलोच राजकी फायदो पदरांत पडचो ना, हाचें भान आशिल्ल्यान म्हणा वा ताची स्पश्ट जाणविकाय जावपाक लागल्ल्यान ‘श्रीं’ चें म्हणल्यार शरद पवारांचे इत्से प्रमाण अजितदादान हें पावल घालें नासत मूं, असो प्रस्न जायत्या जाणांक पडला तो अतार्कीक म्हणपाक जावचें ना.
अजितदादा पवार हांणी महाराष्ट्राच्या राजकारणांत स्वताची अशी एक खाशेली सुवात तयार केल्ल्यान जें पावल तांणी घालां तें फाटलो फुडलो कसलोच विचार करनास्तना घालां अशें कोणूय म्हणचो ना वा तसो विचार लेगीत करचो ना. ताच्या फाटल्यान जायतीं कारणांय आसपाक शकतात. अजित पवारान घेतिल्ल्या पवित्र्या वयल्यान पुराय महाराष्ट्रूच न्हय जाल्यार देशाचें एकूण राजकारण धवळून गेलां. ह्या कथीत भुंयकापा उपरांत स्वता शरद पवार हांणी केल्लीं विधानां आनी एकूण बंडाचे फाटभुंयेर अजित पवार हांणे दिल्ले संकेत हाचो विचार केल्यार हें बंड शरद पवार हांचे मान्यताये उपरातं जालां, असो समज करून घेवपाक बरोच आदार आसा. शरद पवार हांणी केल्ल्या विधाना उपरांत राजा अकबराच्या मेल्ल्या पोपटाचीय जायत्या जाणांक याद आयली. कार्याध्यक्ष, सरचिटणीस, विरोधी पक्ष फुडारी, चडशे सगलेच आमदार खासदार थेट भाजप शिवसेनेच्या सरकारांत वांटेकार जाता आसतना राष्ट्रवादीचो पोपट अजून मरूंक ना अशें शरद पवार सांगतात, ताचेर हासपाचें काय रडपाचें हेंच कळना. चलयेच्या मोगांतल्यान घेतिल्लो निर्णय पक्षांत सगल्यांक आवडूं ना हाची जाणविकाय तांकां जाल्ली. अशा वेळार पक्षाक ऊबाठा वांगडा फरफटत वचपाक दिल्यार कांयच साध्य जावचें ना हाची जाणीव जाले उपरांतूच घडये अजितदादाक तांणी पांचवो बावटो दाखयल्लो आसुंये, अशेंय घडपाक शकता. आपूण न्यायालयांत वच्चो ना, लोकांच्या न्यायालयांतल्यान सगलें परत मेळयतलों, असें शरद पवार सांगतात तेन्नाच आपूण सगलें पळोवन घेतलों हेंच तांकां सांगपाचें आसत हाची खात्री पट्टा.
एकूण राजकारणाच्या आनी फुडले लोकसभा वेंचणुकेचे नदरेन महाराष्ट्रांतली ही घडणूक म्हत्वाची. शरद पवार हे पिरायेचेर सगळे कडेन फिरून लोकांची मतां समजून घेवपाचो यत्न करतले आनी ते उपरांत घडये आपले पत्ते उक्ते करतले. आयज निदान शरद पवार हांचो अजित पवारान पोपट केला असोच लोकांचो समज जाला. तीन- साडेतीन वर्सां आदीं फांतोडेर सोपूतविधीक लागून आपूण कसो तोंडार पडिल्लों हें अजितदादा विसरपाचो प्रश्नूच ना. कारण म्हणल्यार काकाचे मान्यतायेन तें सगले जुळोवन हाडिल्लें, मात काकान अकस्मात मारतें घेवंन अजितदादाची फजिती केल्ली. ह्या फावट मात तांणी काकांचे मूक सहमतीन सगळेंच जुळोवन हाडिल्ल्याचें दिसता. ना जाल्यार प्रफुल्ल पटेल, छगन भुजबळ, दिलीप वळसे पाटील, सुनील तटकरे, अनिल पाटील अशे सगलेच फुडारी फाटी- फुडें करनास्तना अजितदादाक सहज साथ कित्याक दितात, हें कळपाक मार्ग ना. महाराष्ट्रांतले नवे राजकी घडणुकेक लागून राष्ट्रवादी काँग्रेस पक्ष लेगीत फुडले लोकसभा वेंचणुकेंत राष्ट्रीय लोकशाय आघाडेचो एक घटक पक्ष आसतलो हें जशें स्पश्ट जालां तशेंच विरोधी पक्षाच्या प्रस्तावीत म्हाएकवोटा खातीर तो एक व्हडलो धपको थारपाक शकता. भाजप प्रणीत राष्ट्रीय लोकशाय आघाडे खातीर जाल्यार निश्चितूच हाका लागून नवें बळगें मेळ्ळां वा तेच खातीर तर हो अट्टाहास आशिल्लो. केंद्रांतल्या भारतीय जनता पक्षाक लोकसभा वेंचणुकेंतल्या ताच्या प्रस्तावीत जैताच्या मार्गांत आयज कोणूय आडवो आयिल्लो आवडपाचें नाशिल्ल्यान आतां फुडलो नंबर कोणाचो हाचेरूय तर्क वितर्क काडटात. राष्ट्रीय जनता दल युनायटेड हें घडये भाजपचें फुडलें लक्ष्य आसपाक शकता. सगले कडेन शिंपडून पडिल्ले विरोधी पक्ष भाजपाक सोंपोवपाक जे ताकदीन एकठांय येवपा खातीर यत्न करतात तितलेच ते एकमेकां पसून पयस वतात अशें चित्र महाराष्ट्रांतल्या सध्याचे घडणुकां वयल्यान दिसपाक लागलां. महाराष्ट्रांत महाविकास आघाडी आनी चड करून उद्धव ठाकरेच्या ऊबाठा खातीर जाल्यार ही घडणूक म्हणल्यार मरणघांट थारपा सारकी आसा.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
