भांगरभूंय | प्रतिनिधी
जायत्या लोकांक पावसाचो आस्वाद घेवपाक आवडटा, पूण पावसा वांगडाच कांय संसर्ग येतात. देखून ह्या हंगामांत स्वताक निरोगी दवरप हें एक आव्हान. पावसाच्या दिसांनी दोळ्यांचो त्रास वाडटा. केन्ना केन्ना दोळ्यांत घाण उदक पडल्यार संसर्ग आनी तांबडे दोळे जावप सारकिल्ले त्रास जातात. दोळे सगळ्यांत संवेदनशील आनी नाजूक आसतात देखून तांची जतनाय घेवप म्हत्वाचें.
पावसाळ्यांत दुयेंतीचें प्रमाण वाडटा. उदक आनी उदकांतल्यान जावपी दुयेंसां निर्माण जातात. ताका लागून दोळ्यांत जंतूंचो संसर्ग जाता आनी दोळे तांबडे जावप, खाज येवप आदी लक्षणां दिसतात. दोळ्यांचे दोतोर पावसाच्या दिसांनी दोळ्यांची जतनाय घेवपा विशीं म्हायती दितात.
1) पावसाचें उदक दोळ्यांत गेल्यार दोळे साद्या पिवपाच्या उदकान धुवचे.
2) दोळ्यांत चिकटपणा आनी घाण आसल्यार दोळ्यांच्या दोतोराचो सल्लो घेवचो. योग्य वेळार वखद घेवचे.
3) पावसाळ्यांत दोळ्यांच्या पापण्यांचेर रांजणवाडी, आनुली जावपाचें प्रमाण चड आसता. कापूस वा निवळ कपडो गरम उदकांत बुडोवन दोळ्यांचे पातकडेचेर जाल्ली गांठ शेकची.
4) हेर घरगुती उपाय करिनासतना दोतोरान सांगिल्ले प्रमाण वखदांचो वापर करचो.
5) पावसाच्या दिसांनी जंक फूड खावपाची इत्सा आसली तरी निरोगी आहारुच घेवचो. कारण जंक फूड कितलेंय बरें आसलें तरी कांय वेळार माल पडटा. घरांतलें जेवल्यार भलायकेक बादा जायना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
