भांगरभूंय | प्रतिनिधी
भांगरभूंय । खबरां मेज
पणजीः अखील भारतीय कोंकणी परिशेदेचो 84वो स्थापणूक दीस कार्यावळ अंदू कोंकणी परिशदेन उजवाड घराब्याच्या पालवान शेनवार 8 जुलयाक सेंट अँथनी इगर्ज, सिनागॉक, चर्च रोड, गडहिंग्लज हांगा आयोजीत केल्या. परिशदेचे कार्यदर्शी गौरीश वेर्णेकार, जोड कार्यदर्शी मायाखरंगटे आनी भांडारी शिरीष पै हांणी एके पत्रकार परिशदेंत ही म्हायती दिली.
ज्ञानपीठ साहित्य पुरस्कार जैतिवंत दामोदर मावजो, सिंधुदुर्ग डायोशेसनाचो बिशप ओल्वीन बार्रेटो आनी पर्वरीच्या विद्या प्रबोधिनी म्हाविद्यालयाचे प्राचार्य डॉ भूषण भावे उक्तावण कार्यावळीक मुखेल सोयरे म्हणून हाजीर रावतले. हे कार्यावळींत डॉ भावे हांचे व्याख्यान जातलें.
अंदूच्यान दिवपाक सुरवात जाल्लो माधव मंजुनाथ शानभाग जीणे गौरव पुरस्कार कवी, लेखक आनी पत्रकार अॅड उदय भेंब्रे हांका भेटयतले. उक्तावण कार्यावळी उपरांत लुईस रॉड्रिग्ज हांच्या संचलना खाला परिसंवाद जातलो. दनपारच्या जेवणा उपरांत जावपी सांस्कृतीक कार्यावळींत थळाव्या लोकांचें सादरीकरण, गोंयांतल्या कोंकणी भाशा मंडळाच्या रवींद्र केळेकार ज्ञानमंदिर विद्यालयाच्या तशेंच गोंयच्या कला आनी संस्कृती खात्याच्या विद्यार्थ्यांचें लोककला सादरीकरण जातलें. साहित्य आनी कोंकणी मोगींनी हे कार्यावळीक हाजीर रावचें अशें आवाहन परिशदेच्या जाळवणदारांनी केलां.
बशीची वेवस्था
स्थापणूक दीस कार्यावळीक वचपा खातीर मडगांवच्यान कदंब बशीची वेवस्था केल्या. ती मडगांवच्यान सकाळीं 6.30 वरांचेर सुट्टली, 7 वराचेर पणजे पावतली आनी म्हापशें करासवाडो हांगच्यान गडहिंग्लज वतली आनी सांजे 4.30 वरांचेर ह्याच मार्गान परत गोंयांत येतली. ज्या कोणाक हे बशीन येवपाक जाय जाल्यार तांणी माया खरंगटे हांचे कडेन 9420685278 ह्या मोबायल नंबराचेर संपर्क सादचो अशें कळीत केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
