भांगरभूंय | प्रतिनिधी
एक अणभव – 14
–
हें हावसिंग सोसायटीचें कथानक प्रत्यक्ष अणभवांचेर आनी कांय काल्पनीक गजालींचेर आदारून आसा. प्रत्यक्ष जिवो वा मरण आयिल्लो मनीस, घडणूक हांचे कडेन हाचो संबंद ना. तो जुळत जाल्यार निव्वळ एक योगायोग समजुचो.
– लेखक
आतां वूमनस राईट्स कमिशन आमचेर येता काय बायलांचो साद येता हाची आमी वाट पळोवंक बशिल्ले. (आतां मुखार….)
गंडभैरांवान धाडिल्ल्या चार बायलांची फौज तर म्हजेर आक्रमण करून गेल्ली, आतां मुखार तो कसलें लचांड आमचेर घालता वा धाडपाची तयारी करता हाचो काय नेम नाशिल्लो, आनी ह्या खातीर आमी सादूर राविल्ले. म्हज्या म्हऱ्यांत येवन वतगेर दोन वरां वयर हे चौकडेन, जातूंत ताडीमोडीय बी आशिल्ली, तांगेलें हितगुज गंडभैरांवां कडेन जाल्ले. गंडभैरांव केन्ना, खंय आनीक कसली बगलांटा आमचेर घालीत आनी म्हाका आनीक म्हगेल्या समितीक कसले परिस्थितीक तोंड दिवचें पडत हें सांगूं येनाशिल्लें. ई- मेल फारांत तर ताणें कारेगाद इंग्लीश वापरून आमकां बरयिल्ले, कीं “खंच्याय एका वांगड्याक पुसून आमकां प्रश्न विचारपाचो अधिकार आसा आनी ताका जाप दिवपाक आमी उत्तरदायी आसात. कायद्या भितर प्रत्येक वांगड्याच्या हक्काचें संरक्षण करूंक तश्यो तरतुदी केल्ल्यो आसात. वांगड्यांचे हक्क सुरक्षीत करपाक ह्या व्यतिरिक्त आनीक मंच आसात मागीर तो वांगडी भोवमतांत आसू वा अल्पमतांत”. आतां तागेलीं हीं उतरां वेळ येतगेर “लोकां सांगे ब्रह्मज्ञान आपण कोरडे पाषाण” जावपाचें काय कितें हे याद उरचे खातीर आमी आमच्या गांठवलाक घट्ट बांदून दवरिल्ली .
तीन म्हयन्यां उपरांत गंडभैरांवान बॅकस्टेबींग करीत रजिस्ट्रारांत केल्ली कागाळ आमच्या हातात पडटा म्हणसर वेंचणुकेची वाटचाल मुखार पाविल्ली. इतले सगळे अणभव घेत घेत आतां म्हाका गंडभैरांव दिश्टी पडल्यारच सणसण मारूक लागिल्लें. ताजेर फुडाराक नदर घालपना हें हांवें थारायिल्लें. गंडभैरांव रुपी अवचिन्नाचो असलो हो आगळो वेगळो अणभव म्हगेल्या उब्या आयुष्यांत हांव सोसायटीच्या निमतान पयले खेप घेतालों.
हे वाटेन आमी स्पेशल जनरल बॉडी मिटिंगेचे मिनिट्स धाडटगेर गंडभैरावान आनीक एक मेलाचो फार आमचेर मारिल्लो. गंडभैरांवाली कवनां/ कुबांडा आमी समजूंक शकताले, पूण हांगा दलभंजनान कोलांटी मारिल्ली. वूमन्स कमिशन, बायलांचो साद फुस्स जाता म्हणसर हो नवो दलभंजन अध्याय चालू जाल्लो. आपली झलक आमका ताणें हाचे पयलीं दाखयिल्ली, पूण तो इतल्या सकयल्या पांवड्यार पावत आनीक फटींगपणाचो कळस गांठत अशें म्हाकाच न्ही तर आमकां कोणाकूच दिसूं नाशिल्ले. दलभंजन म्हळ्यार आमचे भितरलो एक म्हालगडो म्हणून ताका आमी रेसपेद दिताले, पूण हे घडणूके उपरांत तो मातये भरवण जाल्लो. आमचे नदरेंत तरी तो सकल देंविल्लो.
गंडभैरांवाल्या मेलांत दलभंजनान सायन केल्ली आनी म्हणिल्लें की आपणें ऑडिट रिपोर्ट ऑडिटराली चूक सारकी करूनच फायल करूक सांगिल्लें. तें सारकें जातगेरूच आमी स्पेशल जनरल बॉडी मीटिंगेचे मिनिट्स फायल करचे. ही फट गंडभैरांव मारता आनी दलभंजन ताका साथ दिता ती पळोवन परत एकदा आमच्या कपलाच्यो शिरो तट्टतटपाक लागिल्ल्यो. आमचे कडे विडिओ मीटिंग जाल्ले कारणान रेकॉर्डिंग तर आशिल्ले. तीमण्णा ताचे कडेन फोनार उलयलो आनी विडिओ क्लिप ताका धाडून दिलें, पूण दलभंजनान वयल्यान तीमण्णाकच शापतां सांगलीं. तसो दलभंजन म्हणजे दिसपाक साक्षात सीताराम बापू , भायल्यान पर्वत- पूण भितर खरवत …मुहमें राम बगल मे छुरी … अप्रतिम अशे दुहेरी व्यक्तिमत्व…एकार एक अणभव हांव आनीक तीमण्णा घेताले. सोसायटी करून फुडाकार घेतालो म्हूण तीमण्णाचे आनी आमी समितीचेर आसा तांची व्होवंडीक फाटीर हात मारून करतगेर चोवीस वरां जावची आसात, उरफाटे उलोवपी गंडभैरावाल्या मेलार सायन करून मेकळो जातालो. आत्तां हांगा जाल्यार मागीर थंय, फाट परतुच्या पयलीं दुसरेच उलटे मत, चळिल्लो दलभंजन दिवपाक कसोच फाटी फुडें पळयनाशिल्लो.
आमी आमचे मॅनेजमेंट समितीचे मीटिंगेक सगळे नोंदी करी. थाराव पास केलो की हो ऑडिट रिपोर्ट बदलूंक काय ऑडिटर आयकना आनी दलभंजनान तर कल्टी मारल्या. फुडलें सगळे कितें म्हणटा तें नवी समिती वेंचणूक जातगर पळोवन घेवं अशी खरी गजाल बरयत फकत ड्राफ्ट मिनिट्स आमी रजिस्ट्रार ऑफिसाक फायल केले. फुडें ऑडिट रिपोर्टस आनीक बाकीच्यो फरमालदादी कितें आसात तें वेंचून आयिल्ली नवीन समिती पळोवन घेत अशेंय आमी आमच्या थारावांत बरयिल्लें आनी रजिस्ट्रार ऑफिसांक बी कळयिल्लें.
इतलें मजगतीं आमी सोसायटीची वेंचणूक घेवचे खातीर हालचाली परत चालू केल्ल्यो. फाटपुरवण करून रजिस्ट्रारान आमची फायल हातांत घेतली. नकटीच्या लग्नाक बारा विघ्नां म्हणटात, आमकां दोबरादीन विघ्नां आयिल्लीं आनी ती पार करीत करीत आमी एकदाचे वेंचणुकेचे दिशेन पाविल्ले. वेंचणुको बेगीन कित्याक म्हणूनय गंडभैरांव फार मारत आशिल्लो. कोव्हिडाची साथ आशिल्यान आमकां खूप आडखळी येताल्यो. हांव आनी तीमण्णा ते परिस्थितीतूंय रजिस्ट्रार ऑफिस वचून प्रक्रिया मुखार व्हरपाचे प्रयत्न करताले. शेवटाक आमच्या प्रयत्नक यश आयिल्लें. रजिस्ट्रार ऑफिसाच्या कर्मचाऱ्यांनी साथ दिल्ल्यान घोडो मुखार सरूंक लागलो. ताचे फाटल्यान बी वेंचणूक जायसर हांवें पन्द्रशीक सात- आठ पावटी रजिस्ट्रार ऑफिसाक मारल्यो आनी सगळे पेपर वेवस्थित हाडून नोटीस बोर्डार लायले आनीक सगळ्या वांगड्यांक ई- मेल केले.
नामांकानाचो वेळ येतगेर गंडभैरांव आपली फौज घेऊन रजिस्ट्रार ऑफिसांत ताडीमोडी सयत तीन वांगड्यांक घेवन पावलो. तो थंयच्यान भायर सरना फुडें म्हाका रजिस्ट्रारांतल्यान फोन आयलो की थंय येवन हो गंडभैरांव तांकां शापता सांगता आनीक आजनेरी करता. तांकां खंय तांगेलें ऑफिस कशें चलोवचें हाजेर बी ताणें आपलें ज्ञान तांचे कडेन पाजळिल्लें अशें म्हाका सांगत सोसायटीचो वांगडी नासतना तो कसो येता असो प्रश्न बी म्हाका ताणें विचारिल्लो. हांवे नमळायेन ताचे कडेन दुर्लक्ष करपाची विनवणी तांकां केली. तो ताडीमोडीलो घोव म्हटगेर ताका सांबाळून घेत मुखार सरपाची विनवणी केली. म्हाका हातूंतल्यान सुटका जाय आशिल्ली आनी थंयुय वचून ह्या संकासुरान जर केस्तांव आनी नाडपेन्ना केल्यार आमीच लजेक पडटले आशिल्ले. आमचे वतीन तांकां कितेंय तपशील लागत जाल्यार म्हजेंच नाव आनी नंबर त्या तांगेल्या फायलींचेर बरयिल्ले आशिल्ले. आनी म्हणून सगळ्यो चवकशो म्हजें कडेन येताल्यो.
गंडभैरांव पांच वांगडी एकठांय करून समिती करपाक धडपडटालो. दलभंजन तर तांगेले जे सतरा वांगडी मेल सायन करताले तांकां फोन करून उचकायतालो, तांकां फक्त समितींत येयात, फक्त आयल्यार पुरो, बाकीचें कांय करूंक नाका, मुखार सगळें तो आनी गंडभैरांव पळयतात, अशें सांगत सुटिल्लो. चार- पांच दीस गरो घालतकच सुटयेक म्हणून रावपाक आयिल्लो पाशांव तांगेल्या गरयेक आडकल्लो. भायल्या देशांत रावपी थंड स्वभावाचो पाशांव चवथो गडी म्हणून फॉर्म भरूक पावलो. निमाणी तारीख जायसर गंडभैरावाक पांचवो गडी मेळ्ळो ना. आमी जे पांचूय लोक पयलींच्या समितीचेर आशिल्ले तांणी फॉर्म ना भरपाचें थारायिल्लें. आमकां हे घाणींतल्यान भायर सरचें आसलें आनी गंडभैरांव कितें करता तें पळोवचें आसलें. ताका संद दिवची आसली.
आतां गंडभैरांवाली चार लोकांची समिती बिनविरोध वेंचून आयिल्ली. रिटर्निंग ऑफीसरान तांकां रजिस्ट्रार ऑफिसांत आपोवन सगळ्यो फार्मालदादी पुराय करत तांची बोर्ड ऑफ डायरेक्टर म्हूण नियुक्ती केल्ली. ताडीमोडी सेक्रेटरी जाल्ली, दुर्गे जाल्ली खजिनदार, आनीक चेरमेनाची माळ पाशांवाच्या गळ्यांत पडिल्ली. “दुसऱ्यांक शास्त्रा सांगता आनी आपूण पोरसांक हागता” ह्या वेळार हे म्हणीची याद म्हाका जाल्ली. गंडभैरांव आपूण सांगिल्लीं शास्त्रां कितपत पाळटा तो पळोवचो वेळ रोखडोच येवचो आशिल्लो.
ह्या बोवाळांत, गुरवान सालू कडल्यान बुधवाराक दिश्ट काडूंक येता म्हणून रकाद धाडिल्लो. हांव हस्तांतरणाच्या तयारेक लागिल्लों. (फुडें चलता…)
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
