भांगरभूंय | प्रतिनिधी
खबरां संस्था
नवी दिल्लीः वन-डे वर्ल्ड कपाच्यो मॅची ज्या मैदानांचेर जातल्यो थंय ह्या सिझनांत भारताच्यो द्विपक्षीय क्रिकेट माळेंतल्या मॅची जावच्यो नात. ज्या शारांक वर्ल्ड कपाच्यो मॅची मेळ्ळ्यो नात तांका ह्या माळेंतल्या मॅचीचें आयोजन करपाची संद मेळटली. बीसीसीआयचो सचीव जय शाह हाणे वर्ल्ड कपाचें वेळापत्रक जाहीर करचे पयलीं राज्याच्या क्रिकेट मंडळाची बसका घेवन तांकां ही म्हायती दिल्ली.
मोहाली, नागपूर, विशाखापट्टनम आनी इंदूर सारक्या शारांनी वर्ल्ड कपाच्यो मॅची जावच्यो नात. थंयच्या मैदानाचेर वर्ल्ड कपा पयलीं जावपी ऑस्ट्रेलिया- भारत माळेंतल्यो मॅची जातल्यो. वर्ल्ड कपाच्यो मॅचींचें आयोजन करपी राज्यांच्या क्रिकेट मंडळाक जय शाहन पत्रां बरोवन भारताच्या भोंवडेर येवपी देशांच्यो मॅचीचें आयोजन सोडपाक सांगलां. ताचें ही विनवणी तांणी मानून घेतल्या. दिल्ली, धर्मशाळा, चेन्नय, कोलकाता, मुंबय, पुणे, हैदराबाद, अहमदाबाद, बंगळुरू आनी लखनौ हांचो तातूंत आसपाव आसा.
वर्ल्ड कपांतल्यो सराव मॅची गुवाहाटी आनी तिरुअनंतपुरम हांगा जातल्यो. द्विपक्षीय मॅचींचें आयोजन करपाक तांकां प्राधान्य दिवपाचें बीसीसीआयन थारायलां. देशांतल्या सगल्या मैदानाचेर वर्ल्ड कपाच्यो मॅची जावपाक शकनात. ज्या सुवातांनी ह्यो मॅची जातल्यो तांका तांच्या मैदानार जावपी द्विपक्षीय मॅची सोडपाची विनवणी बीसीसीआयन केल्या आनी तांणी ती मानून घेतल्या अशें जय शाहन सांगलें.
1996 आनी 2011च्या वर्ल्ड कपाच्यो सेमीफायनली मोहालीच्या आय एस बिंद्रा स्टेडियमाचेर जाल्ल्यो थंय अंदूच्या वर्ल्ड कपाच्यो मॅची जावच्यो ना. तशेंच नागपूर, इंदूर, रांची, राजकोट, रायपूर, कटर आनी विशाखापट्टनमांत मॅची जावच्यो नात. ऑस्ट्रेलिया वर्ल्ड कपा पयलीं आपले भारत भोंवडेंत तीन वन-डे मॅची खेळटली. हे भोंवडेतल्यो मॅची ह्या मैदानार खेळयतले.
वर्ल्ड कपा उपरांत भारत न्यूझिलंड आनी अफगाणिस्ताना आड वन-डे मॅची खेळटलो. 2024 वर्सा इंग्लंडा आड 5 टॅस्ट मॅचींची माळ जातली. उपरांत बांगलादेशा 2 आनी न्यूझिलंडा आड 3 टॅस्ट मॅची खेळटलो. 9 मैदानांचेर वर्ल्ड कपाच्या दरेकी पांच मॅची जातल्यो. हैदराबाद 3 मॅची जातल्यो.
वर्ल्ड कप क्रिकेट सर्त 5 ऑक्टोबर तें 19 नोव्हेंबर मजगतीं जातली. हैदराबादांत तातूंतल्या 3 मॅची शिवाय 2 सराव मॅची जातल्यो. गुवाहाटी आनी तिरुअनंतपुरांत देकरी 4 सराव मॅची जातल्यो. मुंबय आनी कोलकातांत सेमीफायनली जातल्यो आनी फायनल अहमदाबादांतल्या नरेंद्र मोदी स्टेडियमाचेर जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
