भांगरभूंय | प्रतिनिधी
खबरां संस्था
लंडनः कॅप्टन बेन स्टोक्यान 9 सके आनी 9 चौक्यांनी वादळी 155 धांवड्यो करून लेगीत लॉर्ड्सा वयले दुसरे टॅस्ट मॅचीत इंग्लंडाक ऑस्ट्रेलिये कडल्यान 43 धांवड्यांनी हार खावची पडली. 5 टॅस्ट मॅचीचें हे अॅशेस माळेंत ऑस्ट्रेलियेन 2-0 अशी आघाडी घेतल्या. ऑस्ट्रेलियन बॉलरांक घाम हाडपी स्टोक्सान निमाणे जोस हेजलवुडान कॅच आवट करून ऑस्ट्रेलियेच्या जैताचे मार्गांतलो कांटो काडलो.
जॉनी बेअरस्टो आवट जाल्या उपरांत 6 आवट 193 अशें स्थितींत बेन स्टोक्सान बॅटिगेची सूत्रां आपल्या कडेन घेतली आनी पंगडाक जैत मेळोवन दिवपाचेंय ह्या निर्धारान खेळून ताणे पंगडांक 301 धांवड्यांचेर व्हेले. मात हेजलवुडाच्या बॉलार अलेक्सान ताची कॅच घेतली.तो आवट जाल्या उपरांत शेपटे कडल्या रॉबिन्सन (1), स्टुअर्ट ब्रॉड (11) आनी जोस टोंग्यू (19) हांका हेजलवूड, क्युमिन्स आनी स्टार्कान 26 धांवड्यांत आवट करून पंगडाक 43 धांवड्यांनी जैत मेळोवन दिले. हेजलवुड, क्युमिन्स आनी स्टार्कान दरेकी 3 विकेटी घेतल्यो.
बेन स्टोक्सान आपले टॅस्ट कारकिर्दींतलो 13वो आनी ऑस्ट्रेलिये आडचो दुसरो शेंकडो केलो. .कॅमेरून ग्रीनाचे ओव्हरींत एकाफाटल्यान एक अशे तीन सके हुबोवन ताणे आपलो शेंकडो पुराय केलो. 142 बॉलांत ताणे शेंकडो पुराय केलो.
शेंकडो पुराय केल्या उपरांतच्या 72 बॉलांत 5 सके आनी 1 चौक्यान ताणे 155 धांवड्यो केल्या उपरांत जोस हेजलवुडान ताकां कॅच आवट केलें. तेन्ना इंग्लंडाच्या नांवार 301 धांवड्यो लागल्ल्यो. स्टोक्सान कॅमेरून ग्रीनाचे एके ओव्हरींत 24 धांवड्यो केल्यो. एके ओव्हरींत सगल्यांच चड धांवड्यो करपाच्या इयान बॉथम आनी हॅरी ब्रूक हांच्या विक्रमा कडेन ताणो बोरोबोरी केली.
पयले टॅस्टी उपरांत इंग्लंडाची ही सेगीत दुसरी हार. दुसरे टॅस्टीचे निमाण्या दिसा तांकां जैता खातीर 257 धांवड्यो जाय आशिल्ल्यो. पांचव्या दिसाचो खेळ सुरू जालो तेन्ना तांच्या हातांत 6 विकेटी आशिल्ल्यो. चवथ्या दिसा तांणी 4 आवट 114 धांवड्यो केल्ल्यो. बेन डकेट 50 आनी बेन स्टोक्स 29 धांवड्यांचेर खेळटाले. पांचवे विकेटी खातीर ताणी 69 धांवड्यांची भागिदारी केल्ली. जो रूट 18, हॅरी ब्रूक 4, जॅक क्रॉली आनी ऑली पोप दरेकी 3 धांवड्यो करून आवट जाले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
