भांगरभूंय | प्रतिनिधी
दोन खेपेचो संवसारीक वस्ताद वॅस्ट इंडिजाचो पंगड वर्साचे अखेरेक भारतांत जावपी संवसारीक वन डे क्रिकेट सर्तीचा पात्रताय मेळोवपाक अपेशी थारलो. झिम्बाब्वेंत चालू आशिल्ले पात्रताय फेरयेंतले सुपर सिक्सांत ताका स्कॉटलॅण्डा कडल्यान 7 विकेटींनी हार घेवची पडली.
संवसारीक वन डे क्रिकेट सर्तीच्या इतिहासांत पयले खेपे वॅस्ट इंडिजाचो पंगड खेळटना दिसचो ना. वॅस्ट इंडिजान 1975 आनी 1979त सेगीत दोन खेपे सर्त जिखिल्ली.
हरारे स्पोर्ट्स क्लबाच्या मैदानाचेर जाल्ले मॅचींत वॅस्ट इंडिजान पयलीं बॅटींग करतना 181 धांवड्यो केल्यो. जॉन्सन चार्ल्स आनी शामार्ह ब्रूक हांकां ब्रॅण्डन मॅकुलमान खातें लेगीत उगडपाक दिलें ना. मुखेली शाई होप (13) आनी कायले मेयर्स (5) हांकां लेगीत पंगडाक सांबाळपाक जमलो ना. ओपनर ब्रॅण्डन किंग 22 धांवड्यांचेर बाद जाल्या उपरांत पळयता पळयता विंडिजाचो अर्द पंगड 60 धांवड्यांचेर तंबूंत परतून गेलो. निकोलस पुरन (21) काल फॉर्मांत दिसूंक ना. अणभवी जेसन होल्डर (45) आनी रोमारियो शेफर्ड (36) हांणी म्हत्वाची खेळी करून वॅस्ट इंडिजाक लजेक पडपा पसून वाटायलो. अखेरेक ताचो डाव 181चेर सोंपलो.
स्कॉटलॅण्डाच्या बॉलरांनी जे तेरेचें प्रदर्शन केल्लें तशेंच प्रदर्शन वॅस्ट इंडिजाचे बॉलर करतले अशी आस्त पंगड वेवस्थापनाक आशिल्ली. पूण, तशें जावंक ना. ओपनर क्रिस्तोफर मॅकबायडाक शुन्याचेर बाद जालो. उपरांत मॅथ्यू क्रॉस आनी ब्रॅण्डन मॅकुलम हांणी शेंकड्याची भागिदारी करून वॅस्ट इंडिजाची हार निश्चीत केली. ह्या दोगांयनी 175 बॉलांनी 125 धांवड्यांची भागिदारी केली. मॅकुलमान 106 बॉलांनी 8 चवके आनी एक सक्याचे मजतीन 69 धांवड्यो केल्यो.
क्रॉस आनी जॉर्ज मुन्सी हांणी 37 धांवड्यांची भागिदारी केली. ही भागिदारी अकिल होसैनान फोडली. ते मेरेन विंडिजाच्या हातांतल्यान मॅच गेल्ली. क्रॉसान नाबाद 74 धांवड्यो केल्यो. स्कॉटलॅण्डान जैता खातीर गरजेच्यो धांवड्यो 43.3 ओव्हरींनी फकत 3 विकेटी वगडावन केल्यो.
स्कॉटलॅण्डाच्या ब्रॅण्डन मॅकुलमान अश्टतासांचें प्रदर्शन केलें. पयलीं ताणें वॅस्ट इंडिजाच्या तीन बॅट्समनांक बाद केले आनी उपरांत 69 धांवड्यांची खेळी करून स्कॉटलॅण्डाक जैत मेळोवन दिवपाक म्हत्वाची भुमिका वठयली. ताचीच मॅन ऑफ द मॅच पुरस्कारा खातीर निवड केली.
सध्या पात्रताय फेरयेच्यो सुपरसिक्स मॅची चालू आसात. सध्या सुपरसिक्सांत श्रीलंका आनी येजमान झिम्बाब्वे दरेकी 6 गूण घेवन पयल्या टॉप दोनांत आसात. वॅस्ट इंडिजाच्या खात्यांत तीन मॅची उपरांत लेगीत एकूय गूण ना. तशेंच ताची नेट रन रेट -0.510 आसा. श्रीलंका (1.832) आनी झिम्बाब्वे (0.752) परस उणी आसा.
ताका लागून सुपरसिक्सांतल्यो निमाण्यो तिनूय मॅची जिखून लेगीत वॅस्ट इंडिज संवसारीक सर्तीचे मुखेल फेरयेंत पावप शक्य ना. कारण जिखून लेगीत ताच्या खात्यांत स गुणांची भर पडटली. जर श्रीलंका आनी झिम्बाब्वे आपल्यो उरिल्ल्यो मॅची हारले तरी लेगीत दोगांयची रन रेट वॅस्ट इंडिजा परस बरी आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
