भांगरभूंय | प्रतिनिधी
समृद्धी म्हामार्गाचेर मध्यान रातीं घडली दुर्घटना
बुलढाणा : महाराष्ट्रांतल्या बुलढाणा हांगां शुक्रारा रातीं देडांक प्रवासी बशीच्या भिरांकूळ अपघातांत 25 जाणांक मरण आयलें. बशींत उजो लागिल्ल्यान ते मेले.
ही बस नागपूर सावन समृध्दी म्हामार्गा वयल्यान पुण्यां वताली. त्या वेळार सिंदखेडराजा लागसार पिंपळखुटा गांवांत हो अपघात जाल्लो. हे बसीत 32 प्रवासी आसले. तातूंतल्या 25 प्रवाशांक मरण आयलें. जखमी प्रवाशांचेर बुलढाणाच्या हॉस्पिटलांत उपचार चालू आसा.
ही बस नागपूर सावन पुण्यां वताली. बशींत नागपूर, वर्धा आनी यवतमाळाचे प्रवाशी आशिल्ले. पिंपळखुटा गांवां लागीं पावतकच बशीचो फुडलो टायर घट जालो आनी समृद्धी हायवे पुलाक धपको दिवन बस उमथली. उपरांत कांय मिण्टांनी उजो लागलो आनी स्फोट जावन 25 प्रवाशांक मरण आयलें.
अपघाता उपरांत डिझेल रस्त्यार पडला. बशीक उजो लागिल्ल्यान कुडी लासल्यात. तांची वळख पटोवप कठीण जालां, अशीय म्हायती मेळ्ळ्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
