भांगरभूंय | प्रतिनिधी
धनंजय डी सिल्वा (93) हाच्या अर्द शेंकड्या नेटार श्रीलंकेन संवसारीक वन डे क्रिकेट सर्तीचे पात्रताय फेरयेंत आनीक एक जैत जोडलें. ताणें सुपर सिक्सांत नॅदरलॅण्डाक 21 धांवड्यांनी हारयलो. ह्या जैता सयत श्रीलंका पंगडान सुपर सिक्सांत गुणतकट्यांतली पयली सुवात मेळयली.
दासुन शनाकाच्या फुडारपणाखाला खेळपी श्रीलंकेचे तीन मॅची उपरांत स गूण जाल्यात. ताच्यो आनीक दोन मॅची बाकी आसात. पात्रताय फेरयेंत पयल्यो दोन सुवातो मेळोवपी पंगड ऑक्टोबर-नोव्हेंबर म्हयन्यांत जावपी संवसारीक क्रिकेट सर्तीक पात्र जातले.
बुलावायोंतल्या क्विन्स स्पोर्ट्स क्लब मैदानाचेर श्रीलंकेन टॉस जिखून पयलीं बॅटींग करपाचो निर्णय घेतलो आनी 47.4 ओव्हरींनी सगल्यो विकेटी वगडावन 213 धांवड्यो केल्यो. ताची सुरवात बरी जाली ना. शुन्य धांवडेचेर ताची पयली विकेट पडली. ते उपरांत डी करुणारत्ने आनी कुसल मॅण्डिस हांणी डाव मुखार व्हेलो. दोगांयनी दुसरे विकेटी खातीर 22 धांवड्यांची भागिदारी केली. ही जोडी रियान क्लेनान फोडली. ते उपरांत सदीरा समरविक्रम एक धांवडी करून तंबूंत परतलो. चरिथ असलंकाक लेगीत खाशेलें प्रदर्शन करपाक जमलें ना आनी वैयक्तीक दोन धांवड्यांचेर बाद जालो.
डाव असो गडगडटा आसतना मदले फळयेंतलो बॅट्समन धनंजय डिसिल्वान 93 धांवड्यांची खेळी करून पंगडाचो स्कोर दोनश्यां वयर पावयलो. लोगन वान बीक आनी बास डी लिड्स हांणी दरेकी 3 विकेटी घेतल्यो. शाकिल जुल्फिकाराक दोन विकेटी फावो जाल्यो.
मोखीचो फाटलाव करपी नॅदरलॅण्डा वतीन वेस्ले बारसी (52) आनी मुखेली स्कॉट एडवर्ड्स (67) हांणी अर्द शेंकड्याची खेळी केली. बेस डी लिड्सान 41 धांवड्यांचें योगदान दिलें. पूण, पंगडाक जैत जोडपाक जमलें ना. नॅदरलॅण्डाक ही धांवसंख्या लेगीत व्हड थारली. 40 ओव्हरींनी ताचो डाव 192चेर सोंपलो.
श्रीलंके वतीन महीश तिक्षणान तीन विकेटी घेतल्यो. जाल्यार वनिंदु हसरंगाक दोन विकेटी फावो जाल्यो. लहिरू कुमारा, दिलशान मधुशंका आना दासून शनाका हांकां एकेक विकेट फावो जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
