भांगरभूंय | प्रतिनिधी
मे म्हयन्यांत नव्या युगांतल्या कॅशलेस, कार्डलेस आनी संपर्कविरयत फारीकणी वेव्हारा परस आधुनीक पर्याय आशिल्ल्या युनिफायड पेमेंट्स इंटरफेस (यूपीआय) वरवीं 14.3 लाख कोटी रुपयांचो विक्रमी वेव्हार जालो. एप्रीलाचे तुळेंत म्हयन्याळ्या तत्त्वाचेर वेव्हाराचें मोल 2 टक्क्यांनी (14.07 लाख कोटी) आनी वेव्हाराचें प्रमाण 6 टक्क्यांनी (8.89 अब्ज) वाडलां.
नॅशनल पेमेंट्स कॉर्पोरेशन ऑफ इंडियाच्या (एनपीसीआय) आंकडेवारी प्रमाण, मे म्हयन्यांत निमाण्या धा दिसांत 3.96 अब्ज रुपयांचे वेव्हार पुराय जाले. फाटल्या वर्साच्या ह्याच म्हयन्यात म्हळ्यार मे 2022 वर्साचे तुळेंत वेव्हाराचें प्रमाण 58 टक्क्यांनी आनी मोल 37 टक्क्यांनी वाडलां. केंद्र सरकार आनी राज्य सरकार सध्या डिजिटल फारीकणी वरवीं वेगवेगळ्या खात्यांत कर वसुली हाडपाक धडपडटात, जाचो स्पश्ट परिणाम हे वाडींत दिसता.
‘इमिजिएट पेमेंट सर्व्हिस’ म्हळ्यार ‘आयएमपीएस’ वरवीं जावपी वेव्हार एप्रीलांत 5.21 लाख कोटी रुपयांच्या तुळेंत सुमार 1 टक्क्यांनी वाड जावन 5.26 लाख कोटी रुपया मेरेन पावला. देखून तांचे वेव्हार क्रमांक 50 कोटी मेरेन पावला. जाल्यार मे म्हयन्यांत ‘फास्टॅग’ वेव्हार 10 टक्क्यांनी वाडले आनी एप्रीलांत 5149 रुपयांच्या तुळेंत मे म्हयन्यांत 6 टक्क्यांनी वाडून 5,437 कोटी रुपया जाले.
कोरोना काळा सावन डिजिटल वेव्हाराक खूब चालना मेळ्ळ्या. ‘यूपीआय’ ही एक सामकी सोपी, सुरक्षीत आनी तात्काळ सुविधा वेगवेगळ्या बँक खात्यांतल्यान मोबायल फोन सारकिल्या एकाच डिव्हायसा वरवीं फारीकणी करूं येता, जी नॅशनल पेमेंट्स कॉर्पोरेशन ऑफ इंडिया (एनपीसीआय) कडल्यान चालू आसा. कॅशलेस अर्थवेवस्था जावपाक युपीआयचो म्हत्वाचो वांटो आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
