भांगरभूंय | प्रतिनिधी
सांखळेच्या विठ्ठल मंदिरात केली सपत्नीक पुजा: भाविकांची गर्दी
दिवचल: प्रती पंढरपूर म्हणून फामाद आशिल्ल्या विठ्ठल मंदीर, विठ्ठलापूर साखळे हांगा एकादशी निमतान भाविकांनी गर्दी केली. मुख्यमंत्री डॉ. प्रमोद सावंत आनी सुलक्षणा सावंत हांणी विठ्ठल मंदिरांत पुजा अभिशेक केलो. गोंयचे जनतेक आनी समेस्त लोकांक बरी भलायकी, समृद्धी लाभची आनी गोंयचे उदरगतीक, तशेंच दरेका घरांत सुख शांती लाभूं अशी प्रार्थना मुख्यमंत्री डॉ. प्रमोद सावंत हांणी केली.
ज्या भाविकांक पढरपुराक वचूंक मेळूंक ना. त्या भाविकांनी तशेंच वारकर्यांनी विठ्ठल मंदिरांत दर्शन घेवपा खातीर गर्दी केली. हें देवूळ बरेंच फामाद आशिल्ल्यान प्रती पंढरपूर अशी ताची वळख आशिल्ल्याचें डॉ. सावंत हांणी सांगलें. विद्यार्थी, बालगोपाल, ज्येश्ठ नागरीक, बायलो अशे व्हडा संख्येन लोक दर्शना खातीर आयिल्ल्याचें पळोवन खूब बरें दिसलें. दरेकल्याच्या घरांत समृद्धी येवची अशी प्रार्थना करून पुराय गोंयकारांक डॉ. सावंत हांणी परबीं भेटयलीं.
आरोग्य मंत्री विश्वजीत राणे हांणी सकाळीं अभिशेक आनी पुजा करून विठ्ठलचरणी सेवा केली आनी सगळ्या गोंयकारांक परबीं भेटयलीं.
गोंयच्या विवीध वाठारांतल्यान दिंडी पंगड घेवन वारकरी आनी भाविकांनी दर्शना खातीर गर्दी केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
