भांगरभूंय | प्रतिनिधी
किरण गुप्ता: प्रिंट मेकींग शिबिराचो समारोप
पणजी: पश्चीम क्षेत्र सांस्कृतीक केंद्र उदयपुरचें गोंय हें म्हत्वाचें वांगडी राज्य आशिल्ल्यान गोंय हें पर्यटन केंद्र न्हय सांस्कृतीक केंद्र म्हणून वळखपाक जाय, अशें पश्चीम क्षेत्र सांस्कृतीक केंद्राची संचालक किरण सोनी गुप्ता हांणी प्रींट मेकींग कलेंत विविधताय आसा आनी तिका उर्बा दिवपाक जाय अशें मत तिणें मांडलें.
बुधवारा पाटो पणजी हांगच्या संस्कृती भवनांतल्या सभाघरांत पश्चीम क्षेत्र सांस्कृतीक केंद्र आनी कला संस्कृती
संचालनालय, गोंय हांच्या जोड पालवान जाल्ल्या प्रिंट मेकींग शिबिराच्या समारोप सुवाळ्याक गुप्ता उलयताली. ह्या वेळार माचयेर मुखेल सोयरे कला संस्कृती मंत्री गोवींद गावडे, कला संस्कृती संचालनालयाचे संचालक सगूण वेळीप, उपसंचालक अशोक परब, सर्वोत्तम सातार्डेकार (उपसंचालक-लेखा) हाजीर आशिल्ले.
राष्ट्राची तुळा करतना कला संस्कृताय कितली गिरेस्त आसा हाचो विचार जाता अशें सांगून आयची समकालीन कला फुडले पिळगे मेरेन पावपाक जाय. कला, संस्कृतायेचें दायज समृध्द जावंक जाय अशें गुप्ता हांणी सांगलें.
गोविंद गावडे हांणी सामान्य मनीस जेन्ना विचार करप बंद करता तेन्ना कलाकाराचो विचार कलेंतल्यान सुरू जाता. मुद्रण तयार करपाक चड वाव मेळचो हे खातीर यत्न जातले. तशेंच जी-20 विशयाचेर ह्या शिबिरां वरवीं दरेका चित्रकारान दाखयल्ले कुशळटायेचीय तांणी तोखणाय केली आनी हें एक अभिनव विचारांचें स्त्रोत अशें तांणी सांगलें.
जे जे स्कुल ऑफ आर्टांतल्यो सीमा अजय गोंदाणे हांणी, ह्या शिबिरांतलो अणभव सगळे तरेन बरो आशिल्लो. जी 20 विशयाक लागून राष्ट्रापती भावना उक्तावपाची संद मेळ्ळी, अशें तिणें सांगलें.
समाजांतल्या गजालींक रूप दिवन ह्या शिबिरांत प्रींट केल्यात. सगळ्यांत पयलें प्रिंटींग प्रेस पुर्तुगेजांनी गोंयांत स्थापन केलां. प्रिंट मेकींग कार्यशाळो सेगीत जावपाक जाय. तांतल्यान प्रिंट मेकींग खातीर उर्बा मेळून बरे प्रिंट मेकर तयार जातले. आनीकूय प्रिंट मेकींग स्टुडिओ गोंयांत जावपाक जाय. गोंय हें सुंदर आशिल्ल्यान तें खंयचेय कले खातीर उपेगी आसा.
– पद्मश्री श्याम शर्मा
गोंयचे नामनेचे चित्रकार हनुमंत कांबळी हांणी पुर्तुगेजांनी गोंयांत पांचशें वर्सां पयलीं राशोल हांगा प्रिटींग प्रेस हाडिल्लो. गोंय कला म्हाविद्यालयांत प्रिंट मेकिंगच्या सामानाची वाट लावन प्रवेश घेवप्यांचेर अन्याय केलो. प्रिंट मेकिंगाक कमर्शियल नदरेन म्हत्व आसा.
सगूण वेळीप हांणी येवकार दिलो. प्रदीप नायक हांणी सुत्रसंचालन केलें. अशोक परब हांणी उपकार मानले. ह्या वेळार कला संस्कृती संचालनालयाच्या शिल्पकला (फायबर ग्लास वर्क) कार्यशाळेंत वाटेकार जाल्ल्यांक मुखेल सोयर्यां हस्तुकीं प्रमाणपत्रां भेटयलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
