भांगरभूंय | प्रतिनिधी
क्रिकेट आयर्लेण्डान भारता आडचे तीन मॅचींचे टी-20 माळेचें वेळापत्रक जाहीर केलें. वॅस्ट इंडिजाचे भोंवडे उपरांत भारताचो पंगड आयर्लेण्डा आड टी-20 माळ खेळटलो. माळेची सुरवात 18 ऑगस्टाक जातली. दुसरी मॅच 20 ऑगस्टाक आनी तिसरी मॅच 23 ऑगस्टाक जातली. तिनूय मॅची मलाहायडांत जातल्यो.
मजगतीं, आयर्लेण्डा पयलीं भारताचो पंगड जुलय-ऑगस्टांत वॅस्ट इंडिजाची भोंवडी करतलो. हे भोंवडेचें वेळापत्रक कांय दिसां पयलीं जाहीर जाल्लें. 12 जुलय सावन टॅस्ट माळेक सुरवात जातली. 27 जुलय सावन वन डे माळेक आनी 3 ऑगस्टा सावन टी-20 माळेक सुरवात जातली.
भारतान निमाणे खेपे पोरूं आयर्लेण्डाची भोंवडी केल्ली. त्या वेळार हार्दिक पांड्याच्या फुडारपणाखाला भारतान दोन टी-20 मॅचींची माळ 2-0 अशा फरकान जिखिल्ली. दोनूय पंगडां मदीं अजून मेरेन फकत दोनूच टी-20 माळो जाल्यात आनी दोनूय माळो भारतान जिखल्यात.
भारताच्या क्रिकेट मंडळान वॅस्ट इंडिजा आडचे टॅस्ट आनी वन डे माळे खातीर भारताच्या पंगडाची घोशणा केल्या. पूण, टी-20 माळे खातीर अजून घोशणा जावंक ना. वॅस्ट इंडिज आनी आयर्लेण्ड ह्या दोनूय पंगडां आड खेळपी पंगडांची एकठांय घोशणा करुये. आयर्लेण्डा आडचे माळे खातीर परतून एकदा हार्दिक पांड्याक मुखेलपद मेळुये.
हे भोंवडे खातीर सिनीयर खेळगड्यांक विसव दिवपाची शक्यताय चड आसा. तशें घडलें आनी तांचे सुवातेर नव्या खेळगड्यांक संद दिली जाल्यार मेळिल्ले संदीचे भांगर करपाची बरी संद नव्या खेळगड्यां कडेन आसतली.
12 म्हयनांनी आमी दुसरे खेपे भारताच्या पंगडाक येवकार दितले. पोरूं जाल्ले माळेच्यो सगल्यो तिकेटी सोंपिल्ल्यो. ताका लागून हे खेपे तीन मॅची आयोजीत करपाचें थारायलें. तीन मॅचींची माळ जावपाची आशिल्ल्यान आयर्लेण्डाच्या क्रिकेट मोग्यांक खेळाचो आनंद घेवपाक संद मेळटली अशें क्रिकेट आयर्लेण्डाचे मुखेल कार्यकारी वॉरेन ड्र्युट्रोमान म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
