भांगरभूंय | प्रतिनिधी
प्लास्टीक पोतयो, बाटल्यो उडोवच्यो न्हय; लोकांक आवाहन
वास्को: प्लास्टीक पोतयो, बाटल्यांक लागून गटारांतल्या, नाल्यांतल्या उदकाचो निचरो जावपाक आडखळ निर्माण जाल्ल्यान कांय सुवातांनी उदक सांचून उरपाचे प्रकार घडल्यात. ह्या प्रकरणाची दखल घेवन वास्कोचे आमदार कृष्णा साळकार हांणी भेटी दिवन थंयच्यो समस्या पयस केल्यो. नागरिकांनी रित्यो बाटल्यो, प्लास्टीक बी गटारांनी, नाल्यांनी उडोवच्यो न्हय अशें आवाहन तांणी केलें.
पावसाच्या दिसांनी उदकाचो निचरो योग्य तरेन जावचो हे खातीर आमदार साळकार हांणी कांय क्रॉस ड्रेनेज ची खोलाय, रुंदाय वाडयिल्ली. ताका लागून पावसाच्या उदकाचो निचरो योग्य रितीन जावपाक मजत जाली. कांय कडेन लोकांनी गटारांनी उडयिल्ल्यो रित्यो प्लास्टीक पोतयो, बाटल्यांक लागून उदकाचो निचरो जावपाक आडखळ निर्माण जाल्या. तांणी थंय भेटी दिवन पळोवणी केली. थंयच्या गटारांतली आडमेळीं पयस केले उपरांत उदकाची वाट मेकळी जाली.
रेल्वे विकास निगमा वतीन रेल्वे मार्गाचें दोट्टीकरणाचें काम सुरू आसा. ते खातीर ल्हान पूल बांदपाचे आसात. पावसाक लागून थंयची माती कोसळपाची घडणूक दोन दिसां पयलीं घडिल्ली. पूण रेल्वेच्या अधिकाऱ्यांनी रोखडीच दखल घेवन ती उदकांतली माती कुशीक काडिल्ली. पूण पयर रातीं सावन कोसळिल्ल्या पावसाक लागून थंयच्या उदकाचो निचरो जावपाक आडमेळीं निर्माण जाली.
ह्या प्रकरणाची म्हायती मेळटकूच कृष्णा साळकार हांणी थंय भेट दिली. त्या वेळार रेल्वेन उदकांत पडिल्ली माती जेसीबी वरवीं काडपाचें काम सुरू केलें. ताका लागून उदकाची वाट मेकळी जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
