भांगरभूंय | प्रतिनिधी
वाळपय: सावर्डे सत्तरी हांगच्या सरकारी हायस्कुलान यत्ता 8वी आनी 9वे खातीर ‘संतांची म्हायती’ ह्या विशयाचेर वणटीपत्रक सर्त आयोजीत केल्ली. तशेंच 5वी ते 7वेच्या विद्यार्थ्यां खातीर आषाढी एकादशी निमतान गटवार दिंडी सर्त जाली. हातूंत शाळेच्या निळ्या, पांचव्या, भगव्या आनी हळदुव्या रंगाच्या गटांतल्या विद्यार्थ्यांनी व्हडा संख्येन वांटो घेतलो.
सकाळीं ज्येश्ठ शिक्षक संतोष बर्वे हांणी आषाढी वारीची परंपरा आनी उपासाचें म्हत्व सांगलें. उपरांत नाट्यकला शिक्षक प्रमोद म्हाडेश्वर हांचे हाजेरींत सगळ्या शिक्षकांनी वारीची सुरवात केली. ’पुंडलीक वरदे हरी विठ्ठल, श्री ज्ञानदेव तुकाराम, पंढरीनाथ महाराज की जय’ अशा गजरात सावर्डें वाठार भक्तीमय करून उडयलो.
पुराय गांवांत दिंडी भोंवून आयल्या उपरांत विद्यार्थ्यांक माध्यान्य आहार वाटलो.
ह्या वेळार सगळ्या शिक्षकांनी उपासाचे जिन्नस हाडून शाळेंत एकादस मनयली.
दिंडी गेल्या उपरांत 8वी ते 9वेच्या विद्यार्थ्यांनी शाळेंत वणटी पत्रकां बरोवन तयार केलीं.
दोनूय सर्तीचें परीक्षण शारिरीक शिक्षक विश्वजीत फडते गांवकार आनी नाट्यकला शिक्षक प्रमोद म्हाडेश्वर हांणी केलें.
वणटी पत्रक सर्तीचें पयलें इनाम निळो, दुसरें भगवो आनी तिसरें इनाम हळदुव्या गटाक फावो जालें. दिंडी सर्तींत भगवो गट पयलो, पांचवो गट दुसरो जाल्यार हळदुव्या गटान तिसरो क्रमांक मेळयलो.
ह्या दोनूय सर्तींचें आयोजन मुख्याध्यापिका सारिका नायक आनी सांस्कृतीक कार्यावळ मुखेली विनोदीता गावडे हांच्या मार्गदर्शना खाला जाल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
