भांगरभूंय | प्रतिनिधी
पर्यटनमंत्री रोहन खंवटे हांणी दिल्ली वचून पुरस्कार स्विकारले
पणजी: गोंय पर्यटन खात्याक इकोनॉमीक टाईम्स ट्रॅव्हल वर्ल्डचे दोन नामनेचे पुरस्कार जाहीर जाल्या उपरांत नवी दिल्लींत जाल्ले एके कार्यावळीक हे पुरस्कार भेटयले. पर्यटनमंत्री रोहन खंवटे हांणी पर्यटन खात्या वतीन हे पुरस्कार स्विकारले. दोन विंगड विंगड वर्गवारींत हे पुरस्कार भेटयले.
पयलो पुरस्कार भारतांतल्या उत्कृश्ठ माईस (मिटींग, इसेंटीव्ह, कॉन्फरन्स आनी एक्झिबिशन) डेस्टिनेशन म्हणून जाल्यार दुसरो वर्साचो उत्कृश्ठ उत्सव आयोजक (सांस्कृतीक आनी राज्य इव्हेंट) म्हणून पर्यटन खात्याक फावो जाले.
पुरस्कार सुवाळ्या उपरांत पत्रकारां कडेन उलयतना पर्यटनमंत्री रोहन खंवटे हांणी, गोंयांक भारतांतल्या आदर्श पर्यटन स्थळाचो मान मेळ्ळा. तो कायम असो उरचे खातीर आमी कार्यरत आसात. गोंय हें संवसारांतलें उत्कृश्ठ लग्न सुवाळ्याचें स्थळ (वेडींग डेस्टीनेशन) तशेंच उत्सव आनी इव्हेंट डेस्टीनेशन म्हणून नामना मेळोवपाची खात्याची येवजण आशिल्ल्याचें तांणी म्हणलें. अशे तरेच्या नामनेच्या पुरस्कारांक लागून आमचे मेहनतीची नोंद जाता आनी ताचे वरवीं आनीक बरें काम करपाची प्रेरणा मिळटा अशें तांणी म्हणलें.
पर्यटनमंत्री खंवटे हांणी पर्यटन खात्याच्या कर्मचार्यांची तोखणाय करतना तांच्या खर यत्नांक लागून खात्याक पुरस्कार फावो जाल्ल्याचें तांणी सांगलें. हो भोवमान पर्यटन मळार आनीक नेटान काम करपाची उर्बा दितलो. पर्यटन खातें सदांच पर्यटन मळार मुळाव्या सुविधांची उदरगत आनी संवसारीक दर्जाच्या सुविधांचें जाळें विणपा खातीर समर्पितपणान काम करतलें. राज्यांत शाश्वत आनी जापसालदार पर्यटन गरजेचें अशें तांणी म्हणलें.
मंत्री खंवटे हांणी पर्यटन मळावेल्या सगळ्या लावधारकांचे उपकार मानतना तांचेें सहकार्य आनी फाटबळा बगर हें सगळें शक्य नाशिल्लें. तांचें सहकार्य हें आमचें काम करपा खातीरची प्रेरणा आशिल्ल्यान प्रधानमंत्री नरेंद्र मोदी, केंद्रीय पर्यटनमंत्री जी किशन रेड्डी, केंद्रीय पर्यटन राज्यमंत्री श्रीपाद नायक आनी अजय भट्ट हांचेंय अतोनात सहकार्य लाभिल्ल्याचें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
