भांगरभूंय | प्रतिनिधी
नरेंद्र सावयकारः संजीवनीच्या ऊस उत्पादकांक बऱ्या दिसाची हमी
भांगरभूंय । प्रतिनिधी
फोंडें: सुविधा समिती वतीन इथेनॉल प्रकल्पा संबंदांतली सगळी प्रक्रिया पुराय केल्या. सरकारान ताचेर निर्णय घेवपाची गरज आसा, अशें आदले खासदार तशेंच सुविधा समितीचे अध्यक्ष नरेंद्र सावयकार हांणी फोंड्यां घेतिल्ले पत्रकार परिशदेंत सांगलें.
संजीवनी साकर कारखान्यांत इथेनॉल प्रकल्प सुरू करचे खातीर सरकारान नेमिल्ले सुविधा समिती वतीन सगळे यत्न केल्यात. समितीच्या दरेका पदाधिकाऱ्यान प्रामाणीकपणान काम केलां. प्रकल्प सुरू केलो जाल्यार ऊस उत्पादकांक बरे दीस येतले, अशी म्हायती सावयकार हांणी दिली.
राज्यांतलो एकसुलो संजीवनी साकर कारखानो बंद केले उपरांत सरकारान केंद्र सरकाराच्या आदारान कारखानो सुरू करचे खातीर प्रक्रिया सुरू केल्ली. ते खातीर सगळ्यांत पयलीं 30 सप्टेंबर 2020 ह्या दिसा कारखानो सहकार खात्या कडल्यान शेतकी खात्याच्या ताब्यांत दिल्लो. इथेनॉल प्रकल्पा संबंदांत अभ्यास करचे खातीर 29 ऑक्टोबर 2020 ह्या दिसा सरकारान सुविधा समितीची स्थापना केल्ली. ते प्रमाण समितीच्या सगळ्या पदाधिकाऱ्यांनी डिसेंबर 2020 त सरकाराक अहवाल सादर केला, अशें सावयकार हांणी सांगलें. सरकारान राज्यांतल्या ऊस उत्पादकांक अर्थीक मजत करचे खातीर 10 जानेवारी 2021 ह्या दिसा 5 वर्सां खातीर अनुदान जाहीर केल्लें. 2020- 21 त 723 ऊस उत्पादकांक, 2021-22 त 689 ऊस उत्पादकांक जाल्यार 2022-23 त 510 उस उत्पादकांक अनुदान दिलां. पूण राज्यांतल्या ऊस उत्पादकांक थाकाय दिवचे खातीर इथेनॉल प्रकल्प सुरू करप योग्य थारतलें, अशें सावयकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
