भांगरभूंय | प्रतिनिधी
म्हापशें: महाराष्ट्रा सयत गुजरातांतल्या घरफोडी आनी हेर गुन्यांवांनी वॉण्टेड आशिल्लो दुबावीत रोहीत चेतन शेट्टी (21, रा. काणका पर्रा आनी मूळ महाराष्ट्र) हाका साळगांव आनी वसई गुन्यांव फांट्याच्या पुलिसांनी जोडमोहिमे खाला अटक केली.
दुबावीत सांगोल्ड्यां आसा, अशी म्हायती पुलिशेक मेळिल्ली. ते प्रमाण पुलिसांनी दुबाविताक धरून ताब्यांत घेतलो आनी वसई महाराष्ट्र गुन्यांव विभागाच्या पुलिशेच्या सुवादीन दिलो. ते उपरांत महाराष्ट्र पुलीस ताका घेवन भायर सरले.
माणिकपूर- ठाणे पुलीस स्टेशनाचे हद्दींत दिसा उजवाडी घरफोडीचो प्रकार घडिल्लो. ह्या चोरी प्रकरणांत दुबाविताचो आस्पाव आसा. तेचवरी दुबाविताचेर महाराष्ट्र आनी गुजरातांतल्या चोरी प्रकरणांत गुन्यांव नोंद आसात.
साळगांवचे पुलीस निरिक्षक मिलिंद भुईंबर हांच्या मार्गदर्शना खाला उपनिरिक्षक अतिकेश खेडेकार, कॉन्स्टेबल वैभव आरोंदेकार आनी तुळशीदास गांवस हांणी वसई गुन्यांव फांट्याच्या पंगडांतले अधिकारी सहाय्यक पुलीस निरिक्षक सुहास कांबळे, सहाय्यक उपनिरिक्षक संजय नावले, हवालदार सुधीर नरले, कॉन्स्टेबल अमोल कोरे हांणी की कामगिरी केली.
दुबावीत रोहीत चेतन शेट्टी महाराष्ट्रांत चोरी करून एका म्हयन्या आदीं गोंयांत आयिल्लो. पुलिशेक मेळचो न्हय हे खातीर तो काणका भाड्याचे कुडींत रावतालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
