फुडारांत जमनी पोंदच्या उदकाक चड म्हत्व

भांगरभूंय | प्रतिनिधी

सुभाष चंद्राः ‘भूजल स्रोतांची शाश्वतता’ विशयाचेर प्रशिक्षण

भांगरभूंय । डीआयपी

पणजीः फुडारांत जमनी पोंदच्या उदकाक चड म्हत्व येतलें. मनीस कल्याणाचे सर्वांगी उदरगतींत भूजल स्रोतांचे शाश्वततायेची भुमिका म्हत्वाची आसतली, अशें उदकास्रोत संचालनालयाचे सचीव सुभाष चंद्रा हांणी सांगलें.

केंद्रीय भूजल मंडळ बंगळुरू आनी उदकास्रोत संचालनालय गोंय सरकार हांच्या जोडपालवान ‘भूजल स्रोतांची शाश्वतता’ विशयाचेर तीन दिसांचें प्रशिक्षण शिबीर आयोजीत केलां. 26 जूनाक पर्वरेच्या सिंचाई भवनांत शिबिराक सुरवात जाली. ताच्या उक्तावण सुवाळ्यांत चंद्रा मुखेल सोयरे म्हूण उलयताले.

भूजल शाश्वता आनी स्रोतांचे उदरगतीच्या नियोजना खातीर उदका पुरवण विभागा कडेन संबंदीत आशिल्ल्या अधिकाऱ्यांची कार्यक्षमता वाडोवपाची गरज आसा, अशें उदका पुरवण आनी नितळसाण विभागाचे मुखेल अभियंते संतोष म्हापे हांणी सांगलें.

भूजल मळार काम करपी राज्य आनी केंद्र सरकाराच्या विभागां मदीं सहकार्य आनी समन्वय आसप गरजेचें आसा, अशें उदकास्रोत संचालनालयाचे मुख्य अभियंते प्रमोद बदामी हांणी सांगलें.

केंद्रीय भूजल मंडळाची विभागीय संचालक एन. ज्योती हांणी प्रशिक्षण कार्यावळीची म्हायती दिली.

प्रशिक्षण कार्यावळींत उदकास्रोत आनी भौशीक बांदकाम खात्याचे अभियंते, तांत्रीक सहाय्यक, सर्वेक्षक आनी गोंय पर्यटन उदरगत म्हामंडळाच्या अधिकाऱ्यांनी वांटो घेतला. उक्तावण सुवाळ्या उपरांत भूजल स्रोतांचे शाश्वततायेच्या विविध विशयांचेर तांत्रीक सत्रां जालीं.  प्रशिक्षण कार्यावळीच्या दुसऱ्या  दिसा अधिकारी पिळर्ण वाठारांतल्या युनिचेम लॅबोरेटरीच्या पावसाचें उदक साठोवपाच्या प्रकल्पाक भेट दितले.