भांगरभूंय | प्रतिनिधी
डॉ. अमिताश बालेकार: सुरश्री केसरबाय केरकार विद्यालयाच्या विद्यार्थ्यांचो भोवमान
सावयवेरें : दरेका विद्यार्थ्यांन खर मेहनत केल्यार येस नक्की आसा. येसा खातीर एकवट, सराव, मेहनत सामकी गरजेची. दरेका विद्यार्थ्याच्या येसाक लागून विद्यालयाची उदरगत जाता, अशें भलायकी अधिकारी डॉ. अमिताश बालेकार हांणी सांगलें.
केरी-फोंडेंच्या सेंट्रो एदुकादोर संस्थेच्या सुरश्री केसरबाय केरकार विद्यालयाच्या धावेच्या येसस्वी विद्यार्थ्यांचो तशेंच पालकांचो भोवमान सुवाळो विद्यालयाच्या सभाघरांत उमेदीन जालो. ह्या वेळार मुखेल सोयरे म्हणून डॉ. अमिताश बालेकार उलयताले. फाटल्या आठ वर्सां सावन सेगीत ह्या विद्यालयाचो निकाल 100 टक्के लागला.
ह्या वेळार माचयेर खासा सोयरे म्हणून केरीची सरपंच तृप्ती नायक हाजीर आशिल्ली. तशेंच संस्थेचे अध्यक्ष विजयकुमार कामत, संस्थेचे सचीव आनी शाळेचे वेवस्थापक संजय प्रियोळकार, खजिनदार सदानंद नायक, पालक – शिक्षक संघाचे अध्यक्ष प्रकाश गाड केरकार, मुख्याध्यापिका उषा नायक, शिक्षिका थळीमा हळर्णकार ह्या वेळार हाजीर आशिल्ले.
फाटल्या 8 वर्सां सावन ह्या विद्यालयाचो निकाल 100 टक्के लागिल्ल्यान दरेक विद्यार्थी, पालक, शिक्षक आनी वेवस्थापन ह्या येसाचे भागीदार आसात. ही परंपरा फुडेंय विद्यार्थ्यांनी चालूच दवरची असो उलो डॉ. बालेकार हांणी मारलो.
संस्थेचे अध्यक्ष विजयकुमार कामत हांणी विद्यालयांतल्यान पास जावन वचपी विद्यार्थ्यानी स्वताचें नांव करचें. दरेका विद्यार्थ्यान समाजाचे रीण फारीक करचें. विद्यार्थ्यांनी आपल्या मुखार योग्य ध्येय दवरचें, अशें तांणी सांगलें.
संजय प्रियोळकार हांणी विद्यार्थ्यां मदीं बरी गुणवत्ता आसप गरजेचें. भुरग्यां मदीं सर्त आसपा जाय अशें तांणी म्हणलें.
ह्या वेळार सरपंच तृप्ती नायक आनी पालक – शिक्षक संघाचे अध्यक्ष प्रकाश गाड केरकार हांणी आपले विचार मांडले.
सुरवातेक विद्यार्थ्यांच्या येवकार गीतान कार्यावळ सुरू जाली. विद्यार्थ्यां हस्तुकीं फुलांचे तुरे भेटोवन मानेस्तांक येवकार दिलो. येवकार गीतान सुवाळो सुरू जालो. विद्यार्थ्यां हस्तुकीं फुलांचो तुरो भेटोवन मानेस्तांक येवकार दिलो. मानेस्तां हस्तुकीं दिवली पेटोवन कार्यावळीचें उक्तावण जालें.
तेजस्वी बर्वे हांणी मानेस्तांची वळख करून दिली. मुख्याध्यापिका उषा नायक हांणी येवकार दिलो. येसस्वी विद्यार्थ्यांची वळेरी प्रविरा साखरदांडे, मुग्धा जाण आनी शोभा प्रियोळकार हांणी सादर केली. येसस्वी विद्यार्थ्यांक मानेस्तां हस्तुकीं इनामां, प्रमाणपत्र आनी यादस्तीक भेटयलें.
पुराय कार्यावळीचें सुत्रसंचालन थळीमा हळर्णकार हांणी केलें. निमाणें धनश्री नायक हांणी उपकार मानले. पसायदानान कार्यावळ सोंपली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
