भांगरभूंय | प्रतिनिधी
पणजीः देशभरांतल्या प्रादेशीक पक्षांच्या अध्यक्षांक मेळून रिव्हॉल्युशनरी गोवन्स पक्षाक (आरजी) घटमूट करपाचो यत्न करपी आरजीचे मुखेली मनोज परब हांणी हालींच तेलंगणाचे मुख्यमंत्री तशेंच भारत राष्ट्र समिती (बीआरएस) पक्षाचे संस्थापक के. चंद्रशेखर राव हांची तेलंगणा वचून भेट घेतली. एकामेकांक सांगात दीत प्रादेशीक पक्षांक घटमूट करपा संबंदांत हे बसकेंत चर्चा जाली, अशें मनोज परब हांणी ‘भांगरभूंय’ कडेन उलयतना सांगलें.
तेलंगणाचे सर्वांगी उदरगतींत मुख्यमंत्री के. चंद्रशेखर राव हांचें व्हड योगदान आसा. सध्याचे स्थितींत तेलंगणा सगळेच गजालींनी हेर राज्यांचे तुळेंत फुडें आसा. ताका लागून आमी तांची तेलंगणा वचून भेट घेतली आनी सुमार दोन वरां विवीध विशयांचेर चर्चा केली, अशें परब हांणी सांगलें.
मुख्यमंत्री ह्या नात्यान काम करतना के. चंद्रशेखर राव हांणी तेलंगणांतल्या शेतकारांक सगळेच बाबतींत आदार मेळोवन दिला. ताका लागून ह्या राज्याचे दरडोई उत्पन्न हेर राज्यांचे तुळेंत अदीक आसा. परकी गुंतवणुकेक चालना दिवन राज्याचो महसूल वाडोवपाचेर तांणी भर दिला. सर्वसामान्य लोकां खातीर विवीध समाज उपेगी येवजण्यो चालीक लावन तांणी तळागाळांतल्या लोकांक आदार मेळोवन दिला. कुशळटाय उदरगतीचेर भर दिवन राज्यांतले तरणाटे बेरोजगार उरचे न्हय हे खातीर लेगीत तांचे यत्न चालू आसात. तेलंगणा सरकारान लोकां खातीर चालीक लायिल्ल्या विवीध येवजण्यांची म्हायती आमी तांचे कडल्यान समजून घेतली, अशें परब हांणी सांगलें. राज्यांतल्यो लोकांचे उदरगतीची जाणीव राष्ट्रीय पक्षां परस प्रादेशीक पक्षांकूच चड आसता. ताका लागून प्रादेशीक पक्ष वाचोवप खूब गरजेचें आसा. सध्या भाजपान जे पद्दतीन राजकारण चलयलां, तातूंत वाटोवपा खातीर देशभरांतल्या प्रादेशीक पक्षांनी एकठांय येवन एकामेकांक आदार दिवन भाजपा आनी काँग्रेस ह्या दोनूय पक्षांक घरा बसोवपाक जाय, हीच भुमिका के. चंद्रशेखर राव हांणी आपले कडेन मांडली. प्रादेशीक पक्ष आशिल्ल्या बीआरएस तेलंगणाची उदरगत करपाक शकता, मागीर हेर पक्ष ती कित्याक करपाक शकना, असोय प्रस्न तांणी आपले कडेन उपस्थीत केलो, अशेंय परब हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
