भांगरभूंय | प्रतिनिधी
खबरां संस्था
मुंबयः भारतीय क्रिकेट पंगडाचो आदलो मुखेल कोच रवी शास्त्रीन फास्ट बॉलर जसप्रीत बुमराहाच्या पुनरागमना विशीं बीसीसीआय आनी निवड समितीक शिटकावणी दिल्या. बुमराह भारतीय पंगडा खातीर एक म्हत्वाचो खेळगडो आसा. वन-डे वर्ल्ड कप सर्त मतींत दवोरून ताच्या पुनरागमनाची घाई केल्यार शाहीन आफ्रिदी भशेन ताका फुडल्या चार म्हयन्यांत खातीर ताका परत पंगडा भायर दवोरचें पडटले हाची विचार करपाक जाय अशें ताणे सांगलां.
एका खेळां चॅनलान दिल्ले खबरे प्रमाण बुमराह ऑगस्टांत भारत आनी आयर्लंड मजगतीं जावपी टी-20 माळे वेळार मैदानार पुनरागमन करपाक शकता. बुमराहा बंगळुरूच्या राष्ट्रीय क्रिकेट अकादमीत फुडल्या म्हयन्यांत कांय सराव मॅची खेळपाक शकता. भारत 18, 20 आनी 23 ऑगस्टाक आयर्लंड आड टी-20 माळ खेळटलो. तातूंत खेळून बुमराह ऑक्टोबर- नोव्हेंबर म्हयन्यांत जावपी वन-डे वर्ल्ड कपाची तयारी करतोलो अशें सांगतात.
बुमराहान वर्ल्ड कपा खातीर जाता तितल्या बेगीन तयार जावचें अशें बीसीसीआय आनी भारतीय निवड समितीक दिसता. ताका लागून ते ताका टी-20 माळेंत खेळोवपाक सोदतात. हे मॅचींत बॉलराक फकत चार ओव्हरी खालपाक मेळटात. बीसीसीआयन मात अजून बुमराहाच्या पुनरागमना विशीं कांय स्पश्ट केलें ना.
पोरूं सप्टेंबर म्हयन्यांत ऑस्ट्रेलियेचे भोंवडेर फाटीक दुखापत जाल्ल्यान बुमराह भारतीय पंगडा भायर आसा. ताचेर न्यूझिलंडान सर्जरी केल्ली. ताका लागून तो डब्ल्यूटीसीची फायनल तशेंच आयपीएल आनी टी-20 वर्ल्ड कपांत भारतीय पंगडांत नाशिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
