भांगरभूंय | प्रतिनिधी
पणजी: प्रा. चिन्मय घैसास हांच्या ’वास्तवाचें चिंतन’ ह्या लेखसंग्रहाचो प्रकाशन सुवाळो मंगळार ता. 4 जुलयाक सकाळीं 11 वरांचेर गोंय विद्यापीठाच्या मुखेल प्रशासकीय इमारतींतल्या परिशद सभाघरांत जातलो. गोंय विद्यापीठाच्या मराठी अध्ययन फांट्या वतीन आयोजीत ह्या सुवाळ्याक गोंय विद्यापीठाचे कुलगुरू प्रो. (डॉ.) हरिलाल मेनन हांचे हस्तुकीं ह्या ग्रंथाचें विमोचन जातलें.
ह्या वेळार पर्वरीच्या विद्या प्रबोधिनी म्हाविद्यालयाचे प्राचार्य प्रो. (डॉ.) भूषण भावे, गोंय विद्यापीठाचे गोंयबाब भाशा आनी साहित्य म्हाशाळेची अधिश्ठता प्रो. (डॉ.) अनुराधा वागळे, संजना प्रकाशनाचे दिनेश मणेरकार हे मानेस्त हाजीर रावतले. गोंय विद्यापीठाच्या मराठी अध्ययन फांट्याचे कार्यावळ संचालक डॉ. विनय मडगांवकार आनी विशेश वक्ते प्रा. नरेश नायक हे मानेस्त ह्या वेळार हाजीर रावतले.
प्रा. चिन्मय मधू घैसास हे गोंय विद्यापीठाच्या मराठी अध्ययन फांट्याचे मराठी प्राध्यापक म्हणून कार्यरत आसात. ह्यान पयलीं तांचे ’रेशीमगाठी’ (निवडक कोंकणी निबंधांचो मराठींत अनुवाद, 2018) आनी कवडसे (लेखसंग्रह, 2021) हे तांचे दोन मराठी ग्रंथ प्रकाशीत जाल्यात. ‘रेशीमगाठी’ ह्या तांच्या भाशांतरीत साहित्यकृतीक मराठी साहित्य मंडळ ठाणे-मुंबय हे संस्थ वतीन 2021 वर्साचो सावित्रीबाई फुले साहित्य भूषण पुरस्कार फावो जाला. ’वास्तवाचें चिंतन’ ही तांची पयलीच कोंकणी साहित्यकृती. ह्या प्रकाशन सगळ्या साहित्य मोगींनी हाजीर रावपाचो उलो आयोजकांनी मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
