भांगरभूंय | प्रतिनिधी
आर्टिफिशल इंटेलिजन्सा विशीं समेस्त उलयतात. इंटेलिजन्स गोंयच्या अभ्यासक्रमांत येता पूण तें अचूक आसा? अपडेटेड आसा? गोंयच्या माथ्यार पोरणें थापपी यंत्रणा आसच्यो नात, अशें न्हय. सादूर रावपाक जाय, सरकारान आनी एआयचो उपेग करप्यांनी. समेस्तांची उलोवणी आयकून एआयचो सोद लावपी संशोधक प्रो. जुर्गेन स्मीधुबेर जागे जाले. सोद लायिल्लें आपलेंच कृत्रीम बुद्धिमतेचें अस्त्र मनशाच्या हाताच्या न्हय जाल्यार बोटांचेरय उरचें ना हें तांणी सांगलें. तो मेरेन एआय दीसभर तुमचे आमचे भोंवतणी घुंवटाळ्यो घालपाक लागलां. छापून येवपी दिसाळींच न्हय जाल्यार व्हिज्युवल मिडिया आतां शॉर्टस (मोटवीं कालसांवां न्हय, पांच- सात उतरांनी घडिल्लें वाक्य), बुलेट्स (बंदुकीच्यो गुळ्यो न्ही. धा खबरो, एका वाक्यांत) खिणाखिणांक धाडटात. वाचल्यार पेंवक येनाशिल्लेय
वाटावतले. गोंय दर्यादेगे पलतडीं धाडपाक बुलेट्स, शॉर्टस जायराती कित्याक आसच्यो न्हय?
एक मिनीट, शॉर्टस, बुलेट्स, बुलेटिन्स, दिसाळीं, व्हिज्युअल मिडिया मनशा बगर तुमचें मुखार आयल्यार? डिजिटल मिडिया मनीसबळा बगर फुडें सरता? बँकांनी एआय पावलां, पूण मनीसबळ नासतना बँको सेवा दितात? येरादारी नेमावळ मोडटल्यांक एआय वरवीं धरतात, ख्यास्तय जाता, मागीर येरादारी पुलीस कित्याक?
साडेतीन दसकांचे दिसाळ्यांतले पत्रकारितेंत तुमी- आमी दिसाक दोन- तीन वेळा कागदाचेर छापून आयिल्ल्यो पुरवण्यो पळयल्यो. दीसभर चलपी व्हिज्युअल मिडियाचीं आनी दिसाळ्याचीं डिजिटल बुलेटिनां, मोबायल एसएमएस धा- पंदरा वर्सां आदींचे? तेच एसएमएस आतां शॉर्टस, बुलेट्स म्हणून अँड्रोयडाचेर पावल्यात. कोविडा वेळार ई- पेपराच्या युगाक व्हड रूप मेळ्ळें, कागदार छापून येवपी दिसाळीं बंद जातलीं असोय बोवाळ जालो, पूण ते ई- पेपरय आनी तीं दिसाळींय आसात. शॉर्टस, बुलेट्सच्या युगांत नवीं दिसाळीं पावलां दवरतात तेन्ना तांणी आयचे परस फाल्यां कितें जातलें तें चड सांगचें पडटलें, इतिहास उस्तून लाव कितलो जातलो? पोर्टल, शॉर्ट, बुलेट्स, बुलेटिना खातीर कायदे जाल्यात? केंद्रान केल्यात जाल्यार ते राज्यांत हाडचे, विदेशांत केल्यार देशान शिकचे.
ई- विधानसभे खातीर तजवीज करपाचे येत्न आदले मुख्यमंत्री मनोहर पर्रीकार हांणी केल्लें, देशान तांचो आदर्श घेतला? काँग्रेस सरकाराच्या तेंपा वयले केंद्रीय अधिकारी आयज भाजपा सरकारांत मंत्री आसात, जी- 20 शेर्पा आसात, ते कोणाचे? देशाचे? काँग्रेसीचे? भाजपाचे? प्रधानमंत्री, मुख्यमंत्री, सरकार एका राजकी पक्षाचें नासता, ते राज्यांतल्या, देशांतल्या समेस्तांचे. लोकसभेचे सभापती ओम बिर्ला गोंयांत येवन गेले, ते ज्ञानी. विधानसभेतलें तांचें भाशण आयकल्यार शाहजहानय शाणे जावपाचे. मनशाक न्हय जाल्यार पदाक मोल आसता हाची जाप विरोधी वांगड्यांक कोण दितलो? पद वोगीच मेळना, ते पासत तपश्चर्या करची पडटा, तपश्चर्येनय एकादरें फळ मेळिल्लें नासलें तरी फुडाराचे आशेर रावपी, अचूक बुलेट्स सोडपीय आसात. अर्थ समजून घेतले बगर, प्रस्न विचारून जापेविणें, सोद घेनासतना बुलेट सोडल्यार सांसणाचें लुकसाणय जाता, हें पत्रकारांनी मतींत दवरचें. बुलेटींतल्यान आयिल्ल्या उतरांचो अर्थ कळ्ळो ना, दुबाव आसल्यार पत्रकारांनी तीं उतरां कुशीक दवरचीं (when you are in doubt, leave it out. सोडून दियात, कुशीक दवरात.) पत्रकारितेंतलो हो एक म्हत्वाचो मंत्र. आयज त्या मंत्राची माहिती दिवपी आसात कितले? पेटोवन घालपी, उजो लावपी पत्रकार तयार जातात? कित्याक? सुवार्था पासत?
जेन्ना सुवार्थ, आपसुवार्थ पत्रकारितेच्या मळार भितर सरता तेन्ना पत्रकारितेंतय आतंकवादी जातात. एका आतंकवाद्याक लागून पत्रकारितेचें क्षेत्रच म्हेळें जाता, सत सांगतनाय सुवार्थाचो वास खबरेक येता तेन्ना खबराकारांक पलतडचो दर्याय पयसावता. दिसाळ्यांतले (प्रिण्ट मिडियांतले) पत्रकार व्हिज्युअल मिडियाचेर निंबून रावल्यार ते शेणपाची भिरांत उक्तावपी एका तेंपार आशिल्ले, पूण प्रिण्ट मिडियाच आयज भौ-माध्यमी जाता तेन्ना पयलींची चौकटय मोडची पडटा. श्रमीक पत्रकार संघटणेन तेन्ना सादूर जावपाक जाय, आदल्यो चौकटी मोडात, भौ- माध्यमाचो नियाळ घेवन नवे कायदे चालीक लायात अशें आड्डून सांगपाची गरज आसा. आमचे शांतीकायेचे भुंयेंतल्यान तें जायत?
वारो, पावस, वताचें कांय सांगूंक जायना अशें म्हणपी बुदवंत आशिल्लें. पावसाक कळाव जाता, रुतू चक्र बदललां? ल्हारां, वारें मुंबय आदीं राजस्थानांत कशें पावता? अदीक श्रावण म्हणून? दर्यादेगांची, सरभोंवतणीची माहिती विज्ञानिकां कडल्यान मेळोवपी पत्रकार जाय. दुकळ सगल्यांक भावता अशें पुस्तकांतल्यान वाचप्यां मेरेन पावोवपी ज्येश्ठ पत्रकार पी साईनाथ हांकां सलाम. तांचे वरी ज्येश्ठांक, ज्ञानवंतांक मेळपाची संद श्रमीक पत्रकार संघटणा दितली? प्लास्टर ऑफ पॅरिसाच्यो गणपती नाका म्हणून सांगपी पर्याय दितले? कागद परतून वापरून (पेपर मॅश) गणपती करपाची कार्यशाळा जाय. अदीक श्रावणांतली दिसपटी कशी आसा? कित्याक, कसो येता अदीक श्रावण? कोण सांगतलो? पावसाचे थेंबे सांठोवया व्रत समेस्तां मेरेन पावोवपी रुशी, कोकण जलकुंभ हाडपी, शिकोवपी गोंयांतय आसात.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
