भांगरभूंय | प्रतिनिधी
पांच दिसांची पुलीस कोठडी; ज्येश्ठ नागरिकांकूच करतालो लक्ष्य
भांगरभूंय । प्रतिनिधी
मडगांवः अमेरिका रिटर्न उमेश चव्हाण (30) ज्येश्ठ नागरिकांक लक्ष्य करून भांगराच्यो वस्ती चोरतालो. तो मूळ सावंतवाडी सिंधुदुर्गांतलो आनी सध्या नावेली वाठारांत रावता. 23 जूनाक दक्षीण गोंय जिल्हो पुलिसांनी ताका अटक केली. ते उपरांत दुबावितान दक्षीण गोंयांतल्या कुंकळ्ळी सयत वेर्णें, मडगांव, कोंकण रेल्वे पुलीस स्टेशनाचे हद्दींत चोरयो केल्ल्याचें कबूल केलें. न्यायालयान ताका पांच दिसांची पुलीस कोठडी फर्मायल्या. सध्या दुबावीत वेर्णें पुलिशेच्या ताब्यांत आसा.
कुंकळ्ळी वाठारांत सेकरावाडा चिंचणीचे चर्चींत प्रार्थने खातीर गेल्ले फिलीपिना पिएदाद फर्नांडीस (71) हिच्या गळ्यांतली सुमार 50 हजार रुपयांची भांगराची सरपळी एका अज्ञात मनशान फारायिल्ली. तो मनीस चॉकलेटी रंगाचे दुचाकी वयल्यान आयिल्लो. ताणें मोटवें कालसांव आनी टीशर्ट घातिल्लें, अशी म्हायती कागाळदारान दिल्ली. ह्या प्रकरणांत कुंकळ्ळी पुलिशेंत गुन्यांव नोंद केल्लो. त्या मनशान जे तरेन चोरी केल्ली, तश्योच चोरयो वेर्णे आनी हेर वाठारांत जाल्ल्यो.
दक्षीण गोंय पुलिशेन मडगांव पुलीस उपअधिक्षक संतोष देसाय हांच्या मार्गदर्शना खाला कुंकळ्ळी पुलीस निरिक्षक तुकाराम चव्हाण, उपनिरिक्षक भरत खरात, कविता रावत, नारायण पाडकार आनी सांगात्यांनी कागाळदारान सांगिल्ल्यो खाणाखुणो आशिल्लो आनी चॉकलेटी रंगाची स्कुटर घेवन उबो राविल्ल्या दुबाविताक ताब्यांत घेतलो. ते उपरांत ताची खोलायेन चवकशी केली तेन्ना ताणें चोरयेची कबुली दिली.
नोकरी नाशिल्ल्यान करतालो चोरी
उमेश चव्हाण अमेरिकेंतल्यान आयले उपरांत बेकारूच आशिल्लो. नोकरी मेळना हे खातीर पयशां खातीर चोरी करपाची सोपी वाट आपणायली. ज्येश्ठ नागरीक चड प्रतिकार करिनात हे खातीर तो तांकां लक्ष्य करतालो. चोरी केल्ल्यो वस्ती तो घाणाक दवरून रीण काडटालो, अशी म्हायती मेळ्ळ्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
