भांगरभूंय | प्रतिनिधी
येजमान भारतान सॅफ वस्तादपण सर्तींत सेगीत दुसरें जैत जोडलें. अ गटांतले मॅचींत ताणें नेपाळाक 2-0 फरकान हारयलो. ह्या जैता सयत भारतान सेमी फायनलींत सुवात मेळयली. बुधवारा जाल्ले आपले पयले मॅचींत ताणें पाकिस्तानाक 4-0 असो हारयिल्लो. ह्या गटांतल्यान कुवेट पंगडान पयलींच निमाण्या चारांत पावला. भारत आनी कुवेट ह्या पंगडां मदीं 27 जूनाक मॅच जातली. सेमी फायनलीची तयारी करपाचे दिश्टीन दोनूय पंगडांक मॅच म्हत्वाची आसतली.
भारता वतीन मुखेली सुनील छेत्रीन आनी नाओरेम महेश सिंग हाणें दरेकी एक गोल केलो. छेत्रीन 61व्या मिनटाक गोल करून खातें उगडलें. सर्तींतलो ताचो हो चवथो गोल थारलो. पाकिस्ताना आड ताणें तीन गोल केल्ले. तशेंच ताचो हो 91वो आंतरराष्ट्रीय गोल थारलो. णव मिनटां उपरांत महेशान गोल करून स्कोर 2-0 असो केलो.
भारतान दुसऱ्या अर्दांत आक्रमक खेळ केलो. ताणें ह्या अर्दांत सेगीत प्रतिस्पर्धी पंगडाच्या गोलपोस्टाचेर आक्रमण केलें. ह्या अर्दांत भारतान गोल करपाचे 10 यत्न केले. हातूंतले पांच शॉर्ट ऑन टार्गेट आशिल्ले. नेपाळान चार यत्न केले. पूण, ताचो एक लेगीत शॉर्ट ऑन टार्गेट नाशिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
