भांगरभूंय | प्रतिनिधी
म्हापशें: म्हापशें शारांत भुंयगत वीज केबल घालपाच्या कामा वेळार वीज खात्यान शारांतले रस्ते खणिल्लें, पूण अजून कांय वाठारांतले रस्ते दुरुस्त करूंक नात. रस्त्या वयल्या ह्या फोंडकुलांतल्यान वाट काडटना वाहन चालकांक कसरत करची पडटा.
वीज खात्याच्या कंत्राटदारान शारांतल्या कांय रस्त्यांची दुरुस्ती करूंक ना. पावस पडटना तांणी पॅचअपचें काम हातांत घेतलां. शारांतल्या कांय रस्त्यांची अजून दुरुस्ती करपाची गरज आसा. चड क रून हळदोणें प्रासार जंक्शना लागसार आनी सुरज बूक स्टॉल मुखा वयल्या रस्त्या वयलीं फोंडकुलां तशींच आसात. शारांतल्या रस्त्यांची जाल्ली अवस्था पळोवन म्हापशें शाराक एकाद्या अविकसीत शाराचें स्परूप आयलां.
शारांतल्या मुख्य वाठारा वरींच दत्तवाडी, गणेशपुरी, खोर्ली तशेंच हेर वाठारांतले भितरल्या रस्त्यांची चाळण जाल्या. आतां पावसान नेट धरिल्ल्यान हीं फोंडकुलां अपघातांक कारण थारपाक लागल्यांत. कांय रस्त्यां वयलीं फोंडकुलां पुरयल्यांत. पूण हें काम निकृश्ट दर्ज्याचें तशेंच पावसांत केलां. डांबर घालून पुरयिल्लीं फोंडकुलां पावसाच्या उदकान परतून तकली वयर काडपाक लागल्यात. हीं फोंडकुलां योग्य पद्दतीन पुरोवंक नाशिल्ल्यान शारांतले रस्ते घातक जाल्यात. कांय कडेन फातर- माती घालून फोंडकुलां पुरयिल्लीं. पूण गाडयो वचून वचून तातूंतली फातर- माती वचून तीं आतां आदले परस व्हड जाल्यांत.
रस्ते दुरुस्तीचें फक्त एक नाटकः विजय भिके
म्हापशें शारांतल्या रस्त्यांची आवतिकाय जाल्या. मदल्या काळांत काँग्रेस पक्षान आवाज काडले उपरांत कांय रस्त्यांचें पॅचवर्क जालें, पूण हें काम दर्जोहीन जालें. ताका लागून परतून फोंडकुलां पडल्यांत. रस्ते दुरुस्तीचें सरकारान फक्त एक नाटक केल्लें. लोकांक फोंडकुलां मुक्त रस्ते दिवपाक म्हापशें पालिका मंडळ आनी आमदार अपेशी थारला. तांणी अजून न्हिदेचें सवंग घेतलां, असो आरोप काँग्रेसीचे सरचिटणीस विजय भिके हांणी केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
