भांगरभूंय | प्रतिनिधी
फोंडें पुलीस स्टेशना मुखार तळ्याचें स्वरूप, खूब कडेन झाडां पडलीं
भांगरभूंय । प्रतिनिधी
फोंडें, मडगांव, म्हापशें: फोंडें वाठारांत शेनवारां सकाळ सावन पडिल्ल्या पावसान सांवार केलो. ताका लागून कांय कडेन लोकजीण विस्कळीत जाली. खूब कडेन सांज मेरेन झाडां पडपाचे प्रकार घडले. व्हाळ उपाट भरिल्ल्यान पुलीस स्टेशना मुखा वयल्या रस्त्या वयल्यान उदक व्हांवतालें. जाल्यार शापूर- बांदोड्यां साफा मशिदी मुखा वयल्या मुख्य रस्त्याचो भाग नेमलो. बेतोड्यां लायटीच्या खांब्याक टेंपोचो धपको बसलो. तशेंच सुकतळी- मोलेंच्या राष्ट्रीय म्हामार्गाचेर पार्क करून दवरिल्ल्या म्हाल व्हरपी ट्रकाचेर टेंपोचो धपको बसून टेंपो चालक जखमी जालो. तेचवरी फर्मागुडये वयल्या गोंय अभियांत्रिका म्हाविद्यालयाचे गेटी लागसार रस्त्याचे कुशीक पार्क केल्ले मोटारीचेर गुलमोहराचें झाड पडलें. तातूंत मोटारीचें लुकसाण जालें. फोंडें उजो पालोवपी दळाच्या जवानांनी घडणुकेचे सुवातेचेर वचून झाड कापून कुशीक काडलें.
फोंडें पुलीस स्टेशना लागसार आशिल्ल्या व्हाळांत व्हड प्रमाणांत कोयर सांचिल्ल्यान व्हाळाचें उदक फोंडें पुलीस स्टेशना फुडल्यान व्हांवपाक लागलें. हो प्रकार दनपारां 12 वरांच्या सुमाराक घडलो. ताका लागून कांय वेळ पुलीस स्टेशना मुखार तळ्याचें स्वरूप आयलें.
व्हाळ उपाट भरिल्ल्यान खूबश्यो गाडयो तिस्क- फोंडें मार्गान गेल्यो. ह्या वेळार एक स्कुटर चालक उदकांतल्यान वतना तोल वचून रस्त्याचेर पडून किरकोळ जखमी जालो. रस्त्या वयलें उदक दुकानांनी तशेंच घरांत घुशिल्ल्यान व्हड प्रमाणांत लुकसाण जालें.
शापूर- बांदोड्यां कदंबा बसस्टॅण्डाचेर वचपी रस्त्याचेर कांय दिसां आदीं घाणयाऱ्या उदकाचेर प्रक्रिया करपी प्रकल्पाच्या कामा खातीर खणिल्लें फोंडकूल वेवस्थीत पुरोवंक नाशिल्ल्यान शेनवारा पावसांत रस्तो नेमलो. त्या वेळार प्रवाशी बसी थंयच्यान वचूंक नाशिल्ल्यान व्हड अनर्थ टळ्ळो. थळाव्या लोकांनी सोमतीच घाणयाऱ्या उदकाचेर प्रक्रिया करपी प्रकल्पाच्या अभियंत्यांक म्हायती दिले उपरांत दनपारां दुरुस्तीकाम हातांत घेतलें.
बाणावलें घराचेर झाड पडलें
बाणावलेंच्या मारिया हॉला सागसार रानवटी झाड घराचेर पडिल्ल्यान घराचें लुकसाण जालें. ते भायर वार्का बाणावले पणसाचें झाड वीज सरयांचेर पडिल्ल्यान ह्या मार्गा वयलीं येरादारी बंद जाली तशेंच वीज पुरवण बंद जाली. मडगांव उजो पालोवपी दळाच्या जवानांनी ताकतिकेन घडणुकेचे सुवातेर वचून झाडां कुशीक काडलीं.
गोंयांत पावसान नेट धरला. वादळी वाऱ्याक लागून झाडां पडपाच्यो घडणुको घडपाक लागल्यात. बाणावली वाठारांत दीसभरांत दोन कडेन झाडां पडलीं. मेळिल्ले म्हायती प्रमाण मडगांव उजो पालोवपी दळाक बाणावले मारिया हॉला लागसार पियो फर्नांडीस हांच्या घराचेर रानवटी झाड पडिल्ल्याचो दनपरां तीन वरांच्या सुमाराक कॉल आयलो. जवानांनी ताकतिकेन थंय वचून तीन वरांच्या यत्नां उपरांत झाड कुशीक काडलें. हे झाड वीज सरयांचेरूय पडिल्लें. ताका लागून येरादारी बंद जाल्ली.
बार्देसांत झाडां पडून वीज खात्याचें लुकसाण
पावसाक लागून शेनवारा बार्देस म्हालांत चार झाडां पडलीं. हे घडणुकेंत वीज खात्याचें लुकसाण जालें तशेंच वीज पुरवण बंद पडली.
म्हापशें उजो पालोवपी दळाचे हद्दींत तीन झाडां पडलीं. हीं तिनूय झाडां रस्त्याचेर पडली. ह्या वेळार वीज सरयो तुटल्यो. सिरसय, पीर्णा आनी रेवोड्यां चावडीवाड्यार हीं झाडां पडलीं.
तशेंच पिळर्ण उजो पालोवपी दळाचे हद्दींत मायना पिळर्णां काँक्रीट सिमेंटाच्या घराचेर झाड पडलें. हे घडणुकेंत घराचें कसलेंच लुकसाण जावंक ना. म्हापशें आनी पिळर्ण उजो पालोवपी दळाच्या जवानांनी तीं चारूय झाडां कापून कुशीक काडलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
