भांगरभूंय | प्रतिनिधी
गोंयांत सण- परबो आमी व्हडा दबाज्यान मनयतात. पावसाच्या हुवारांत येता तो सण म्हळ्यार सांज्यांव वा सांजांव. ही परब
येवचे णव दीस पयलीं लोक सांत जाॅन द बाप्तीस्ट हाची नोवेनां करतात. दर वर्सा जुनाचे 24 तारखेर आमचे क्रिस्तांव भाव सांजांव व्हडा उमेदीन मनयतात. सगळ्यांचेच चित्त वेधून घेवपी असो हो सण. सांजांव हो सण सांत जॉन बाप्तीस्टच्या नांवान मनयतात. हो ‘सुपीकतायेचो सण’ अशेंय म्हणटात. हाचे फाटलें कारण म्हळ्यार जॉन बाप्तीस्टाची आवय सांत एलिझाबेथ आनी बापुय जाकिर्य (जाकारिस) देवाचे कायम भक्तीन विलीन आसताले. सगळें ऐश्वर्य आशिल्लें, नासलें तें पदराक भुरगें ही कायम तिच्या मनांत खंत. त्या तेंपार भुरगें नाशिल्ली बायल आसप म्हळ्यार व्हड शिराप. तांकां थोमणे आयकुचे पडटाले. जॉन जल्मांक येवचे आदी जाकिर्या हांकां देवदूत गाब्रिएलाचो साक्षात्कार जालो. ते दिव्य शक्तीन म्हळें ‘देवान तुची आंगवण पुराय करपाचें थारयलां. तुजी बायल गर्भवती जातली आनी त्या चल्याचे नाव तुवे जॉन दवरचें पडटलें’ अशें ताका कळीत केलें. जाकार्यान हाचेर विस्वास दवरलो ना. मुखार अशें खरेंच घडलें. एलिझाबेथाक दीस गेले. जॉन जल्मांक येता मेरेन जाकिर्याची मात वाचा बंद जाली.
आपल्याक आवय जावपाचें सुख भोगचेंना अशें चिंतपी एलिझाबेथ आज आवयपणाचें सुख जियेताली. तिका जाण्टे पिरायेचेर गुरवाचार आयल्लो. हो चमत्कारुच म्हणपाचो. तिच्या सुपीकतायेची खबर आयकून तिची चुलत भयण सायबीणमाय स्वता गर्भवती आसतना, म्हळ्यार जेजू पोटांत आसतना स्वता चलत जुडिया गांवांत एलिझाबेथाची खबर घेवपाक आयली. सायबीण माय खबर घेवंक आयल्या तेन्नाच जॉनान आपल्या आवयच्या गर्भांत उमेदीन उडकी मारली, कारण ताका जेजूची लागसारपणाची, ताच्या आगमनाची चाहुल लागिल्ली. पवित्र उर्बेन भरिल्लो उमाळ्या सयत एका मोठ्या आवाजान संत एलिझाबेथाच्या तोंडांतल्यान ही उतरां भायर सरली ‘Blessed are you among women and blessed is the child you will bear’. ह्याच भावार्थान आज लेगीत मातृत्वाचें वरदान प्राप्त करपाक खुबशीं बायलां सांजावा दिसा मागणें करतात.
म्हयने उलगले जॉन जल्मांक आयलो. देवदुत गाब्रिएलान सांगिल्ले प्रमाण आपल्या पुताचे नाव ‘जॉन’ दवरप हें जाकिर्यान थारायलें, पुण ताची वाचा फुटना आनी तो कोणाक कांयच सांगपाक शकना, अशी गत जाली. सगळीं नांव दवरपाचो बोवाळ करपाक लागलीं. पयलींच्या तेंपार आजो, पणज्यांची नांवां दवरताले आनी तशेंच नांव ताका वेंचले, पुण ताणें वेग- वेगळ्यो कुरु केल्यो की आपल्या पुताक जॉन हें नाव दवरचें, तरीय ताची भाशा कोणाकुच जमली ना. अखेरेक ताणें जॉन हें नाव पितारुन दाखयले आनी तेन्ना ताची वाचा परत फुटली. अशे तरेन ‘जॉन’ हें नाव संत जॉन बाप्तीस्टाक दवरलें. मुखार वाचनात अशे आसपावता, जे लोग आपल्या पातकांचे निवारण करपाक येताले तांकां संत जॉनान जॉर्डन न्हंयेंत तांचो बातिझ्म केलो. कांय वाचनांत अशेंय आसपावलां की सांत जॉन बाप्तिस्तान हेच न्हंयेंत जेजूचोय बातिझ्म केल्लो.
पातकांचे निवारण जावप असो सांजांव सणाचो भावार्थ आज लेगीत बायंत उडयो मारपाची पद्दत आसा. नवे काजारी जोडपें आसल्यार आंब्या, पणसांचे म्हळ्यार वेग-वेगळ्या हंगामी फळांचें वजे धाडपाची पद्दत आसा. गावगिऱ्या वाठारांत असली मजा पळोवपाक मेळटा. माथ्यार ‘कोपेल’ घालप म्हळ्यार तरन्या चुडट्टांचे किरीट, तातुन अदींमदीं रानफुलां, फळां बांदप. जांव दादलो वा बायल हें कोपेल तकलेक घालून गांवभर ‘विवा सांजांव’ म्हणत फेणी आनी फळां एकठांय करतात. सगळीं बांय जांव न्हंये कडेन जमतकच देवाचें मागणे करुन थोडो फराळ उदकांत सोडटात. नवी काजारी कांय फळां आनी फुलां उदकांत सोडुन आपली इत्सा व्यक्त करपाचे परंपरे प्रमाण मागणें करतात. हे परबेक सान्नां, सोर्पोतेल, फेजांव, पुलाव, चोरीस अशे पारंपारीक जेवण रांदून ताचो आस्वाद घेतात. फळां, फुलांचो परमळ, देवाच्या भावार्थान साबार रंगान भरिल्लो सांजांव. उमेदीच्या हुवारांत, उंटगराच्या पावसांत लेगीत व्हडा दबाज्यान मनयतात हो सांजांव.
अतिशा सुर्लीकार
7262849923
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
