भांगरभूंय | प्रतिनिधी
सांजांव म्हळ्यार क्रिस्तांव समाजाचो उमेदीचो, खोशयेचो दीस. ह्या दिसा नवी व्हंकल आनी जावंय आपल्या सासुमायच्या घरां येता. मागीर सांजांवाक ओतो येता. घरांतलीं सगळीं नवे व्हंकलेक येवकार दितात. बांयंत उडयो मारप ही खाशेली रीत सांजांव परंपरा जावन आसा.
बाणावले गांवात सांत बाप्तीस इगर्ज आसा, थंयचे लोक व्हडा खोशयेन ही परब मनयतात. आमच्या नावेली गांवांत आमी ही परब खूब उमेदीन मनयतात. नावेली- डोंगरी हो साश्टीचो एक गांव, हांगा तरातरांच्यो परंपरा आसात. आमच्या ल्हानपणांत आमची बांय सदांच उदकांन भरताली कारण ती चड खोल नाशिल्ली, आमचो वाडो सगळो क्रिस्तांव समाजान भरिल्लो, शेजरा हुंवारिल्लो व्हाळ आसतालो, आमगेर येवन वाड्यावेले भुरगे नाल्ल, पणस, पयशे मागताले आनी आमचे बांयंत उडयो मारताले.
कांय कडेन घरांघरांनी पातोळ्यो, फळां दिवप ही सांजांवाची आनीक एक पद्दत. ह्या वेळार आंबे, पणस अशी तरांतरांची फळां दितात. अशी ही परब येता तेन्ना जून म्हयन्यांत 23 तारकेक आमचे शाळेंत कोपेल करपाची सर्त घेतात. तें कोपेल करपाक तरांतरांची, फुलां, फांदयो घालतात. मागीर भुरगीं माथ्यार घालून सर्तीन वांटो घेतात. ह्या वर्सां आमचो मिर्ग गोंयांत अजून पावूंक ना. वादळाक लागून पावस पयस पावला. अंदुचे सांजांव सांत बाप्तीसा बरो पावसांत फुलयलो जाल्यार पुरो, नाज्यार बांयंत टँकर घालून उदक घालपाक लागतले आनी मागीर सांजांव सुको जातलो.
देवा सायबा पावस घाल, धर्तरी न्हावन वचूं.
सुचेता कामत पै
9421242859
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
