भांगरभूंय | प्रतिनिधी
भांगरभूंय । प्रतिनिधी
पणजीः भाजपा फुडारी तशेंच टीकटॉक स्टार सोनाली फोगट खून प्रकरणातलो मुखेल दुबावीत सुधीर पाल सांघवा हांची उत्तर गोंय जिल्हो आनी सत्र न्यायालयान सशर्त जामिनाचेर सुटका केल्या.
शुक्राराक जाल्ले सुनावणे वेळार न्यायालयान जामीन अर्जाक मंजुरी दिली. 1 लाख रुपयांची हमी आनी तितलेच रक्कमेचो हमीदार, सीबीआयच्या गोंय कार्यालयांत दर शुक्राराक हजेरी लावप, न्यायालयाचे परवानगी बगर गोंयां भायर वचपाचें ना, गोयांतलो राबित्याचो पत्तो सादर करप आनी हेर अटी न्यायालयांत सांघवाक घातल्यात. ह्या प्रकरणातलो दुसरो दुबावीत सुखविंदर सिंग हाकां मुंबय उच्च न्यायालयाच्या गोंय खंडपिठान हाचे पयलीं जामीन मंजूर केल्लो.
पोरूं 23 ऑगस्टाक सोनाली फोगट हिका वागातोरा दुबावीत परिस्थितींत मरण आयिल्लें. फोगट हिचो भाव रिंकू ढाका हाणे कागाळ केल्या उपरांत पुलिसानी खुनाचो गुन्यांव नोंद करून सांघवा आनी सुखविंदर हांका अटक केल्ली. सोनालीच्या घरच्यानी केल्ले मागणे प्रमाण हे खून प्रकरण तपासा खातीर सीबीआय कडेन दिल्लें. दुबावितां आड म्हापशें न्यायालयांत आरोपपत्र दाखल केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
