भांगरभूंय | प्रतिनिधी
भांगरभूंय । प्रतिनिधी
दिवचलः दिवचलच्या येरादारी पुलिसांनी फाटल्या स म्हयन्यांक येरादारी नेमांक पाळो दिनाशिल्ल्या 13399 वाहन चालकांक तालांव दिवंन दंडाच्या रुपांत तांचे कडल्यान 90 लाख रुपये एकाठांय केले. येरादारी सेलाचो निरीक्षक गौरीश मळीक हाणे दिल्ले म्हायती प्रमाण अंदू जानेवारी तें जून म्हयन्यांत वाहन चालकांचेर ही दंडात्मक कारवाय केल्या.
2022 वर्सा दिवचल येरादारी पुलिसांनी 35503 वाहन चालकांचेर येरादारी नेमाच्या उल्लंघना खातीर दंडात्मक कारवाय केल्ली. तातूंतल्यान कांय कोटी रुपया एकठांय केल्ले. दिवचल मार्केटांत पे पार्किंगाची वेवस्था करपाची घोशणा केल्ली. मात अजून ताची कार्यवाही जावंन ना. मार्केंटांतले कांय गाडे काडल्यान तरी अजून बरेच आसात. ताका लागून वाहनां पार्क करपाक सुवात नाशिल्ल्यान वाहन चालकांक मेळत थंय वाहनां उबीं करून दवोरची पडटात.
नगराध्यक्ष कुंदन फळारी कडेन संपर्क सादलो तेन्ना ताणे पे पार्किंगाची वेवस्था करतले अशें सांगलें. पालिका मंडळाचे फुडले बसकेंत हे संबंदी चर्चा करून उपाय येवजण करतले अशें ताणे सांगलें. दिवचलचो आमदार डॉ चंद्रकांत शेट्ये हाणे पार्किस समस्येचेर उपाय येजवण करपाची सूचोवणी केल्या. ते नदरेन पळोवणी निमण्या पांवड्यार पावल्या अशी म्हायती फळारीन दिली.
मजगतीं शांतादुर्गा हायस्कूल सर्कला कडेन सकाळी आनी दनपारां विद्यार्थी आनी पालकांची गर्दी जाता. ताका लागून येरादारीची कोयंडी जाता. ह्या रस्त्यार झेब्रा कॉसिंगाची वेवस्था करपाची मागणी जाता. ते नदरेन फावो ती कृती करपाची सूचोवणी बांदकाम खात्याच्या रस्तो विभागाक केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
