भांगरभूंय | प्रतिनिधी
फाटलीं दोन वर्सां लागींलागीं टॅनीस कोर्टा पसून पयस आशिल्ली सात ग्रॅण्डस्लॅम जिखपी तशेंच पांच खेपे विम्बल्डनाच्या बायलांच्या एकोडी गटांतलें वस्तादपण जोडपी, आपले आंतरराष्ट्रीय कारकिर्दींत 49 किताब जिखपी 43 वर्सां पिरायेची व्हिनस विलियम्स परतून एकदा विम्बल्डनांत खेळपाक सज्ज जाल्या.
आपले 26 वर्सांचे आंतरराष्ट्रीय कारकिर्दींत तिणें 24वे खेपे विम्बल्डनांत वांटेकार जावपाक बायलांच्या एकोड्या गटांत वायल्ड कार्ड वरवीं प्रवेश मेळयली. तिची अंदूंची ही पयलीच ग्रॅण्ड स्लॅम सर्त आसतली.
व्हिनसान 2017त विम्बल्डनाचे बायलांच्या एकोड्या गटाचे फायनलींत सुवात मेळयिल्ली. पूण, तिका उप वस्तादपणाचेर समाधान मानचें पडिल्लें. फाटल्या दोन वर्सां सावन ती टॅनीस कोर्टा पसून पयस आशिल्ली. पूण, आतां 697वे सुवातेर आसा. तिणें हालींच जाल्ले बर्मिंहम क्लासिकांत 48व्या मानांकीत कॅमिला जिऑर्गी आड खर संघर्शा उपरांत जैत जोडलें.
फाटल्या स वर्सांनी व्हिनसाक ग्रॅण्ड स्लॅम सर्तींचे चवथे फेरयेंत लेगीत मजल मारपाक जमूंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
