भांगरभूंय | प्रतिनिधी
मदरशाचो प्रस्न उपस्थीत केल्ल्यान जिवघेणो हल्लो
मडगांव: हांव रुमडामळचो सरपंच आसतना बेकायदो बांदकामां आड 70 जाणांक नोटिसी धाडिल्ल्यो. तीन बांदकामां मोडून उडयिल्लीं. आतां बेकायदो मदरशाचो प्रस्न उपस्थीत केल्ल्यानूच म्हजेर जिवघेणो हल्लो जालो. हाका सद्याचे सरपंच सैमुल्ला फणीबंध जापसालदार आसात. सद्या रुमडामळांत पंचायत राज कायदो कुशीक दवरून पीएफआयच्या कायद्यान पंचायत चलयतात असो खर आरोप पंचायत वांगडी विनायक वळवयकार हांणी केलो.
पंचायत हॉलांत काल (बिरेस्तारा) घेतिल्ले पत्रकार परिशदेंत ते उलयताले. आदींच्या पंचायत मंडळान बेकायदो मतदाराशाक ‘हरकत ना दाखलो’ दिल्लो. हांव सरपंच जाले उपरांत लोकांचे मागणे प्रमाण तो दाखलो रद्द केलो. अजुनूय त्या मतदाराशाक परवानगी ना. पूण तरी लेगीत थंय धर्मीक कृत्यां सुरूच आसात. लोकांच्या मनांत भिरांत आशिल्ल्यान सेगीत ग्रामसभेंत हो विशय काडटात, पूण पंचायत मंडळ कांयच करिना. ‘हरकत ना दाखलो’ दिल्लो आसतना तातूंत कोणाचीय कागाळ आसल्यार वा त्रास जायत जाल्यार ही परवानगी रद्द जातली अशें स्पश्ट म्हणिल्ल्यान तांकां नोटीस धाडपाचो वा पत्र धाडपाचो संबंदूच येना अशें वळवयकार हांणी म्हणलें.
पंचायत वेंचणुको जाले उपरांत वेंचून आयिल्ले पांच मुस्लीम उमेदवारांनी एकठांय येवन पंचायत मंडळ स्थापन केलें. म्हजे सयत सोफिया शेख, मुर्तझा ह्या दोन पंच वांगड्या सयत विजय सुरमे अशा चार जाणांक भायर दवरले. उरिल्ल्या मुस्लीम पंचांक ते सत्ताधारी पक्षांत घेवपाक तयार आशिल्ले. पूण पंचायत मंडळांत हिंदू पंच नाका आशिल्ले. तांणीच हें उरिल्ल्या पंचांक सांगिल्ल्यान आपणाक तांचो हेतू स्पश्ट जालो अशेंय तांणी म्हणलें.
दोन ते तीन ग्रामसभेंत मदरशाचो विशय जाले उपरांत ताचेर निर्णय जालो ना. ग्रामसभेंत मदरशाक संबंदीत कृत्यां थांबोवपाची नोटीस धाडपाचो निर्णय जाले उपरांतूय दुसरी ग्रामसभा आयली, तरी लेगीत नोटीस धाडूंक नाशिल्ली. फक्त मुस्लीम भावांक तेंको दिवपा खातीर पंचायत मंडळ काम करतालें. ग्रामसभेंत भोवमतान थाराव संमत जाल्ल्यान पंचायती कडल्यान प्रकरण बिडिओ कडेन गेले उपरांत लेगीत नोटीस धाडूं येता. ताका कायद्याचें कसलेंच बंधन ना. तें कृत्य बेकायदो थारना. पूण जो मेरेन न्यायालयाचो निर्णय जाय मेरेन दोन समाजांत वाद जावचो न्हय हे खातीर पंचायतीन नोटीस जारी करप गरजेचें आशिल्लें अशें वळवयकार हांणी सांगलें.
थळाव्यांनी वर्सभराच्या काळांत तीन कागाळी केल्यात. पूण ही पंचायत मुस्लीम पंचायत जाल्ल्यान तांणी तशें केलें ना. ईद परबेक रमजान बाजारा वेळार कसलेच तरेचो पंचायत थाराव घेनासतना तांणी संमती दिवन मनमानी केल्या. एकाच समाजाक सातत्यान सहकार्य केलां अशें वळवयकार हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
