भांगरभूंय | प्रतिनिधी
भांगरभूंय । प्रतिनिधी
पेडणेः पार्सें पंचायतींत आदल्या पंचायत मंडळान सुमार 35 लाख रुपयाचो घोळ केल्ल्याची कागाळ कांय नागरिकांनी राज्याच्या दक्षता खात्यांत करून ताची चवकशी करपाची मागणी केल्या. आदल्या पंचायत मंडळान कोणा कडल्यान मंजुरी घेनास्तना सामान विकते घेतलां अशें कागाळेंत नमून केला.
पंचायत मंडळाची आदली सरपंच प्रगती सोपटे हिणे आमी कसलोच घोटाळो केलो ना आनी आमी कसलेय चवकशेक तयार आसात अशें तिचें कडेन संपर्क सादलो तेन्ना सांगलें. 14व्या निती आयोगा कडल्यान मेळिल्ल्या निधींतले काय पयशे पंचायत तिजोरेंत आशिल्ले. ते कशे तरेन खर्च करपाचे हे विशीं पंचायत मंडळाचे बसकेंत चर्चा करून एकमतान थाराव पास केल्लो. सामान खरेदी करपाच्या निर्णयाक पंचायत प्रशासन खात्यांतल्या अधिकाऱ्यांनी मंजुरी दिल्ली अशें तिणे स्पश्ट केले.
आदल्या पंचायत मंडळान कसलीच संमती घेनास्तना सामान खरेदी केल्ल्याचो प्रश्न हालींच जाल्ले पंचायतीचे ग्रामसभेत चर्चेक आयिल्लो तेन्ना कांय ग्रामस्थांनी चवकशी करपाची मागणी केल्ली. ते प्रमाण दक्षता खात्या कडेन ही कागाळ केल्या. पयलींच्या पंचायत मंडळान लाईटीचे फोकस, वायर आनी हेर सामान विकतें घेवपा खातीर 15 लाख रुपया खर्च केल्लें. हें सामान सावंतवाडीच्यान हाडलां अशें दाखयल्लें. ,सुमार 14 लाख रुपये खर्च करून 4 हजार कोयराच्यो पेटयो हाडिल्ल्याचें बील सादर केल्लें. प्रत्यक्षांत 25 टक्के लोकांक ह्यो पेटयो दिल्ल्यो.साडेतीन लाख रुपया मोलाच्या खुर्च्यो विकत्यो घेतिल्ल्याचें बील सादर केला, मात पंचायती कडेन एकूय खुर्ची ना असो दावो दक्षता खात्यांत केल्ले कागाळेंत केला. कांय ग्रामस्थांनी म्हायती हक्क कायद्या खाला ही म्हायती मेळयले उपरांत फाटल्या पंचायत मंडळान केल्लो अर्थीक घोळ उक्ताडार आयलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
