भांगरभूंय | प्रतिनिधी
डॉ. देविया राणे: पर्यें केंद्र सरकाराचे उदरगत पुस्तिकेचे वाटप मोहिमेचो शुभारंभ
वाळपय: भाजपाच्या डबल इंजीन सरकाराक लागून भौशीक उदरगत चालीक लागता. केंद्र सरकार आनी गोंय सरकारान जारी केल्ल्या खुबश्या कल्याणकारी येवजण्यांचो फायदो सामान्य घटकांक जाता. केंद्र सरकारान फाटलीं णव वर्सां केल्लें काम दरेकल्याच्या दारादारांनी पावप गरजेचें. ताका लागून म्हायती पुस्तकां वाटपाक सुरवात केल्या. हातूंत भाजपाच्या कार्यकर्त्यांनी व्हडा संख्येन हाजीर रावचें आनी केंद्र सरकाराच्यो येवजण्यो सगळे कडेन पावोवपा खातीर सहकार्य करपाची मागणी पर्यें मतदार संघाची आमदार डॉ. देविया राणे हांणी केली.
पर्यें मतदार संघांत घराघरांनी पुस्तिका वाटपाचे कार्यावळीक सुरवात केल्या. हाचो शुभारंभ ठाणे पंचायत वाठारांतल्यान केला. आमदार डॉ. देविया राणे हांणी स्वता घराघरांनी भोंवून पुस्तिका वाटल्यो.
सध्या भाजपाचें डबल इंजीन सरकार चलता. केंद्रांत आनी गोंयांत भाजपा सरकार बरे तरेन चलता. सत्तरी म्हालांतल्या नागरिकांनी आतां मेरेन भाजपाक बरें सहकार्य केलां. ताका लागून उदरगत बरे तरेन चालीक लागल्या. सत्तरी म्हालांतल्या नागरिकांनी परत एक फावट भाजपा फाटल्यान उबे रावन आपली तांक दाखोवची अशी मागणी देविया राणे हांणी केली.
ह्या वेळार तांचे वांगडा जिल्हो पंचायत वांगडी देवयानी गांवस, ठाणे पंचायतीची सरपंच सरिता गांवकार, उपसरपंच तनया गांवकार, पंच वांगडी सोनिया गांवकार, अनुष्का गांवकार, विनायक गांवस, सुरेश आयकर, सुभाष गावडे आनी हेर हाजीर आशिल्ले.
सुरवातेक ठाणे गावाचें ग्रामदैवत मंडळगिरो आनी कोळगिरो ह्या देवळांचें दर्शन घेवन म्हायती पुस्तिका वाटल्यो.
ह्या वेळार आमदार डॉ. देविया राणे हांणी दरेका घरा मेरेन वचून पुस्तिका संबंदीत कुटुंबांक सादर केली आनी तांचे कडेन विंगड विंगड विशयांचे संवाद सादलो. खुबश्या जाणांनी ह्या वेळार आपल्या वाठारांत आशिल्लो समस्या हे विशीं आमदार डॉ. देविया राणे हांचे कडेन चर्चा केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
