भांगरभूंय | प्रतिनिधी
आग्नेलो ए. जे. फर्नांडीस: प्रादेशीक रोजगार विनिमय कार्यालयांत नागरी सेवेचेर मार्गदर्शन सत्रां आयोजीत
पणजीः जिणेंत आयिल्ले अणभवूच मनशाक घडयतात. आपली तांक वळखुपाक आदार करतात. जिणेंतल्या अणभवांचेर बरे नागरीक जायात. बरे प्रशासक जावपाक चौकटे भायर विचार करात अशें कामगार आनी रोजगार आयुक्त आग्नेलो ए. जे. फर्नांडीस हांणी सांगलें.
गोंय सरकाराच्या प्रादेशीक रोजगार विनिमया वतीन चार दीस नागरी सेवेचेर आदारीत ‘सीवील सर्व्हीस कॉम्पीटीटीव्ह एक्जेम्स (जीपीएससी/यूपीएससी)’ ह्या विशयाचेर घडोवन हाडिल्ल्या मार्गदर्शन सत्रांचे कार्यावळींत ते उलयताले. ह्या वेळार मार्गदर्शक म्हणून अॅड. शैलेश कुलकर्णी आनी उमेश धनी हाजीर आशिल्ले.
मार्गदर्शकांनी विवीध सर्तीच्या परिक्षेच्या पांवड्या विशीं आनी नमुन्यांचेर खोलायेन म्हायती दिली. नागरी सेवेच्यो परिक्षा उत्तिर्ण जावपाक इत्सूक विद्यार्थ्यांनी खंयच्या गजालींचेर लक्ष केंद्रीत करपाक जाय आनी तांणी शिकतना कित्याचेर चड भर दिवचो हे विशीं मार्गदर्शन केलें. भारतीय प्रशासनांत प्रवेश मेळोवपा खातीर हेर वेगवेगळ्यो स्पर्धात्मक परिक्षा आसात. त्यो पास जावपाक वा परिक्षेची तयारी करपाक शिकपाचीय पद्दत बदलची पडटा. जो निराश जायनासतना वा सकारात्मक नदरेन पावल उबारता असो विद्यार्थी सर्तीचे परिक्षेचे विवीध पांवडे पार करपाक शकता अशेंय मार्गदर्शकांनी ह्या वेळार सांगलें.
मुख्यमंत्री डॉ. प्रमोद सावंत तशेंच कामगार आनी रोजगार खात्याचे मंत्री आतानासिओ मोन्सेरांत हांच्या सुचोवण्यांतल्यान आनी मार्गदर्शनान प्रादेशीक रोजगार विनिमय तरणाट्यांक प्रोत्साहीत करपाक, तांचें व्यक्तीमत्व घडोवपाक, तांकां फुडारा पासत नवो दिश्टीकोण दाखोवपाक मजत करता. विवीध वाठारांनी तशेंच संस्थांनी वचून तरणाट्यां खातीर प्लेसमेंट ड्रायव्ह, रोजगार मेळावे, करियर मार्गदर्शन सत्रां, तशेंच हेर कार्यावळी आयोजीत करता.
तरणाटे आपल्या पांयार उबे रावचे आनी गोंय राज्य स्वयंपुर्णते कडेन व्हरपाक तांणी पावल उबारचें हे नदरेंतल्यान प्रादेशीक रोजगार विनिमय फुडें सरता. हाचोच एक भाग म्हणून कार्यालयान नागरी सेवेचेर आदारीत मार्गदर्शन सत्रां आयोजीत केल्लीं.
हे कार्यावळीक कामगार उपआयुक्त प्रसाद पेडणेंकार, रोजगार अधिकारी भालचंद्र सिनाय केंकरे, संयोजक म्हणून रजत हरवळेकार हाजीर आशिल्ले. पुराय कार्यावळीचें सुत्रसंचालन आनी येवकाराचें उलोवप सहाय्यक रोजगार अधिकारी दत्तराज नायक हांणी केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
